Baroh shikatta, ka don ka jingnoh mynsiem bakhraw ïa ka Indian National Congress bad ïa ka ri India hi baroh kawei, namar ym don nongïalam Liangpyrshah bakhlaiñ ba ïa aireng bad ka jingmeng jong u Narendra Damodardas Modi. Hynrei kito ki jingleh khyllung jong u Rahul Gandhi ban leit kdup ïa u Modi ha ki samoi ba la dep, kaba ki press bad ka BJP ki ïoh ban rkhie beiñ ki long pynban ki mawkyndon ba un nangkiew bad ihbha ha ka pyrkhat pyrdaiñ. Bad kato ka jingmutdur ba imat ym don Gandhi shuh ban ïalam ïa ka ri, ki la kut noh namar ha kane ka jingpynkhreh election sha ka 18th Lok Sabha u Rahul u la pyni shisha ïa ka jinglong rangbah ha ka saiñ hima.
Ha kawei pat ka liang, haba khmih bniah ïa ka jinglong jingman jong ka Sangh Parivar, i kumba kiei kiei kim ïaidbeit ïaidryntih shuh kumba u Modi u mutdur. Hadien ka jingkheiñ troiñ bad niewbeiñ jong u ïa ka jingklang jong ka ding kaba mih na ka jingïapher jaidbynriew bad ka jingleit jngoh jong u Rahul Gandhi ïa ka jylla Manipur ha kane ka snem 2023 ka paw shaikdar ba um suidñiew shuh ïa kiwei namar u sngewskhem ha ka jingbunpaid ka party jong u bad ka sorkar NDA 2.0. U Modi um tip pat ba ka double engine sorkar jong u ka la pulom ha baroh ki liang,kat haduh ba un da duh syndon baroh artylli ki seat Lok Sabha, namar ba katei ka ding ka klang sah ha Manipur haduh mynta. Balei u nongthoh u ong ba kiei kiei kim ïaidbeit shuh hapoh ka Sangh Parivar, to ngin iapeit. Khyndiat sngi hadien ka jingthaw sorkar biang u Modi NDA 3.0, bluit mih u heh ka Rashtriya Swayamsewak Sangh (RSS) u Mohan Bhagwat ban ther pyrshah ïa u Modi bad ïa u Amit Shah ba ki la leh klet ïa katei ka jylla kaba don hapdeng ka jingïakynad jaidbynriew. Utei u rangbah u ong ruh ba ka jingïatylli ki nongshongshnong ka donkam bha ban pynkhlaiñ ïa ka ri. “U ong ruh ba dei ban klet ïa ki nia pynbieit election (election rhetoric) hynrei ban phai sha ki jingeh kiba ktah ïa ka ri. Ka Manipur ka ïai ap ïa ka jingsuk la shisnem lynter mynta. Ka don ka jingsuk ha katei ka jylla myn 10 snem mynshwa, sngew kumba ka juk rah suloi ka la kut. Hynrei ka jylla kynsan kynsan bthei ka jingïa-umsnam”. U bynrap shuh shuh, ba ka shongsuk shongsaiñ ha Manipur ka dei ban long kaba ha khliehduh jong ka sorkar.
Kaba ar, u Modi u batai pynban da khongpong ïa ka jingkren u Rahul Gandhi hapoh Parliament myn ha kane, ba ki don katto katne ki Hindu kiba kloi ban ïa umsnam. U Modi u pynshit, hana ba u Rahul u kynnoh beiñ ïa ki paid Hindu baroh khoit ba ki dei kiba im ha ka jingïa-umsnam. Hynrei kaba sngewtynnad ka long, ba khyndiat sngi hadien katei ka jingkynnoh jong u Modi, bluit mih sa uwei pat u heh jong ka Sangh Parivar uba incharge ïa ka Uttarakhand Jyotir Math, u Shankaracharya Avimukteshwaranand Saraswathi ban ïada ïa u Rahul Gandhi, ba ong ba ka niam Hindu kam dei kaba pynphriang ïa ka jingpyntriem, ka jingïashun bad ka thok ka shukor. U ong haba nga sngap bha ïa ka jingkren jong u Rahul Gandhi “ngam shem satia kano kano ruh kaba bakla. U ong, ba u Rahul u kren ïa kaba dei eh, ba ka jingïa-umsnam kam dei ban don jaka ha ka niam Hindu”. Utei u riewniam Hindu u ong shuh shuh, ‘ban pynsaphriang ïa kaba shu thok (half- truths) ka dei ka kam bymman, kum kita ki briew dei ban pynsaja syndon, la ki dei na ki nongthohkhubor ne kino kino ki channel’. U ong, ba u Rahul ha ka jingshisha u ther tyngeh ïa ka sorkarpdeng kaba riehtngen ïalade ha ka niam hynrei ym ïa ka niam Hindu’. Tang halor jong kine ki bynta ruh, ki paidbah ki la sngewthuh mano ba berbih ban pynthohbria ïa ki nongïalam
secular.
Wat la u Modi u lah ban sngewmong ïa ka jingmeng jong u (hurt his pride), pynban u Amit Shah u hap ban kohnguh ïa u Mohan Bhagwat ban khot noh wut wut da ka High level Meeting halor ka jinglong jingman jong ka jylla Manipur ha ka 17.06.2024, te ha ei kin beiñ ba ki Opposition ki leh politics, mano ba leh ?.
To ngin phai biang sha ka jingkiew jong u Rahul Gandhi, naduh ba u pynmih ïa ka programme Bharat Jado Nyay Yatra (kaba mut, To ngin ïaid ban Pyntylli ïa ka India na ka bynta ka Hok) kaba sdang naduh ka 14 Kyllalyngkot 2024 na Thoubal, Manipur haduh ka 16 Lber 2024 ha Mumbai, kaba sdang na mihngi bad kaba kut sha sepngi jong ka India. Hooid, shwa ïa kata ruh la don kawei ka Yatra jong u shaduh shaphang shathie ka India. Nangta, sa ka jingshah pharep mukotduma ha ka Enforcement Directorate bad kiwei ki agency ba laiphew jait, wat ban pynduh noh ïa ka jinglong MP jong u ruh, kaba ka sorkar u Modi ka la leh.
Ka jingpaw pyrthei jong ka jinglong rangbah ba pura jong u Rahul Gandhi, dei hadien ba u la shah jied kum u Leader of Opposition (LoP) ha Lok Sabha, ha kaba u la ther tyngeh ïa ka jingthmu barieh jong ka BJP ban pynkylla noh ïa ka Constitution jong ka Ri, ka jingthmu ban khñiot pdot (throttle the voice of opposition) ïa ki liangpyrshah, nangta sa ka jinglehklet ïa ka jingïa-umsnam ha Manipur bad kiwei pat. Kane ka session halor ka Presidential address ka la rah shisha ïa ka burom jong utei u LoP. Ym tang katta, sa kawei kaba sngewtynnad ka long ba utei u heh jong ka Congress u ai mynsiem ïa ki MP jong ngi baroh arngut kumba phla u Saleng Sangma ba kin ïatreilang halor ki mat badonkam jong ka Jylla Meghalaya, kum ka ILP, Eighth Schedule, Boundary dispute bad kiwei. U Modi ha kane ka kynti um lah shuh ban peit beiñ ïa ki Liang pyrshah namar ïalade u dangshaniah ha ka drip jong kiwei ban im, kata ha u Nitish Kumar bad Chandrababu Naidu, namar ba um biang pait shuh. Ka Mahua Moitra ka MP na West Bengal, lei ka la ther tyngeh da kaba ong, namar ba ka BJP ka pyndonkam bakla ïa ka kyrteng u Lord Ram, ka la brut ha ki 63 tylli ki Constituency kaba kynthup ïa ka Ayodhya kaba la wansuid wanshor da ki heh Hindu bad ki heh sorkar India kynthup ïa u Modi ba la phah da ki blei, kumba u khyllew.
Ka Ri India, lada ka dei ban im ka dustur ka riti, ka ktien ka thylliej, ka jingngeit niam ba laitluid, ka hok halor ka khyndew ka shyiap, ka donkam palat ïa ka INDIA Block (Liang pyrshah) kaba khlaiñ, namar haba khlaiñ ka Liang pyrshah, ka im ka Democracy. Wat ha kine ki khyndiat sngi ruh, katba u Rahul Gandhi u dang leit jngoh ïa ki lanot ba phetwir ha ki refugee camp, u Modi pat sha Moscow, um patiaw ei ei ban leit sopspaiñ ïa ka thma pohïing ha ka ri lajong.
