Nongstoiñ, Naitung, 9: Ka long ka bym lah ban ngeit hynrei ka long pat ka jingshisha, ba ka sorkar pdeng ka la ithuh kyrpang ïa ka shnong Langdongdai kaba don ha West Khasi Hills bad kaba hap hapoh ka Mawshynrut C&RD Block kum ka Aspirational village.
U bah Birbor Riangtem sordar jong katei ka shnong haba pyntip ha u nongthoh khubor, u la ïathuh ba hadien ba ka sorkar pdeng ka la ithuh kyrpang ïa katei ka shngong kum ka Aspirational village, ki tnad treikam bapher bapher jong ka sorkar ki ju wan na ka por sha ka por ban ai jinghikai ba bun jait ïa ki paitbah nongshong shnong kum ha ka rep ka riang, thaiñ jingthaiñ bad kiwei kiwei, ki bynta na ka bynta ban kyntiew ïa ka ïoh ka kot jong ki nongshong shnong.
Nalor kata u la ïathuh ruh ba dang shen eh, ki heh jong ka ICAR Umïam ba kynthup ïa u Dr.V.L.Verma Director, ka Dr.M.Bilashini Devi kaba dei ka saïantis, Dr.Vanlalruati bad Dr H.D.Talang, ki la wan ban pynlong ïa ka jingai jinghikai kumno ban rep ban riang ïa ki jait jingthung bapher bapher kum ki syntiew ki skud bad kiwei kiwei ki jingthung.
U bah Riangtem u la ïathuh ruh ba hadien ba la kut ka jingai jinghikai, kitei ki heh jong ka ICAR ki la sam ruh da ki tiar kum ki symbai ba bun jait kum ki symbai jhur, ki symbai syntiew bad kiwei kiwei. Nalor kata ki la sam ruh da ki khiew ban ai um syntiew ki pump ban synreit dawai bad kiwei kiwei ki jait tiar sha ki paitbah kiba la wan ïashim bynta ha katei ka training.
U la ong ruh ba ha katei ka shnong ki la don kumba shisphah hynñiew tylli ki longïing bad ki paitbah nongshong shnong mynta ki ap khmihlynti bad angnud, ba ka sorkar kan pynkloi ban pynïoh sa ïa kiwei pat ki jingdonkam na ka bynta ki paitbah kum ka jaka sumar, ka umbam umdih bad kiwei kiwei.
Hynrei u la ong ba ka jingdonkam kaba hakhmat eh ka dei ka surok, namar lada ym don ka surok kaba biang wat lada ki jingmih na ka thaiñ ki bun katno katno ruh kam don jingmut, namar ki shu sahkut tang ha poh shnong hynrei ban shalan sha ki ïew ki hap ym lah namar ka jingbym don ka surok.
