Shillong, Naitung 13: Lada kwah ban wan kynshew kam ha Meghalaya, kaba biang tam kadei ban leh ha ki District kiba dang sahdien ha ka jingdon ki karkhana naba yn ioh shibun ki jingmyntoi.
Hapoh ka Uttar Poorva Transformative Industrialization Scheme (UNNATI), 2024 ka Industrial Policy na ka bynta ka thainñ shatei lam mihngi, la phiah ha ki ar bynta kata ha ka ‘Zone A bad Zone B Districts’ kaba mut ka Zone A (Ki District ba la kiew ha ka jingdon ki karkhana) bad Zone B (ki District ba dang sahdien ha ka jingdon ki karkhana) katkum ka jingpynshong jong ka NER Districts SDG Index kaba la pynkhreh da ka NITI Aayog, UNDP bad ka Ministry of Development of North Eastern Region.
Nalor kane, la ai ruh ïa ki lad jingïarap na ka bynta ki Unit kiba sengkam hapoh ka Zone B District ban kyntiew ïa ka roi ka san ha kitei ki thaiñ.
Ha Meghalaya na ki 12 tylli ki District, ki don 9 tylli ki district kiba don ha ka kyrdan Zone B. Kine ki 9 tylli ki District ki kynthup ïa ka West Khasi Hills, South West Garo Hills, East Jaiñtia Hills, East Garo Hills, Ri Bhoi, South West Khasi Hills, South Garo Hills, North Garo Hills bad ka Eastern West Khasi Hills.
Ki District kiba don ha ka Zone A ki kynthup ïa ka East Khasi Hills, West Jaiñtia Hills bad West Garo Hills.
Ka sorkar pdeng ka la ong ba ka UNNATI ka long palat ban ïa ka skhim, namar ka long kum ka lad ban kyntiew ïa ka thainñ bad ïa ka ïoh ka kot.
Ka scheme ka la treikam naduh ka 9 tarik u Lber 2024 bad kan treikam haduh ka 8 tarik u Lber 2034. Ka Registration kan bteng haduh ka 31 tarik u Lber 2026 ka ban long pat katkum ki kyndon jingbthah. Ka DPIIT, Ministry of Commerce & Industries ka dei kaba don ïa ka jingkitkhlieh ban khmih bniah bad ban pynïaid ïa ka UNNATI scheme. Ki lad jingïarap kiba lah ban ïoh ki Unit kiba thymmai bad ki Unit kiba la don lypa, ki dei kiba ïaid ban pynïar ïa ka kam jong ki.
Baroh ki Unit kiba lah ban ïoh jingïarap kiba don ha ka Zone A District ha ki jylla jong ka thaiñ shatei lammihngi kin ïoh ïa ka jingbhah tyngka kaba kot @30% ha ka jingseng ïa ka karkhana bad jingthied ïa ki kor ki bor ne na ka bynta ban tei ïa kino kino ki jongtei ne ban pyndonkam ïa kino kino ki jingdonkam kiba kongsan ha kaba la buh ba ki lah ban ïoh haduh T.5 Klur. Na ka bynta kito kiba ka GST kan ym treikam, ka jingai jingïarap kan long haduh T. 10 klur.
Baroh ki Unit kiba don ha ka Zone B ha ki jylla ka thaiñ shatei lammihngi kin ïoh ïa ka Capital Investment Incentive @50% na ka jingbei tyngka ka jong ki ha ka karkhana bad ki kor ki bor ban saiñ ïa ki mar ne ban tei ïa ki jingtei ne ban buh ïa kino kino ki jingdonkam kiba kongsan ka ban long jong ka T.7.50 klur. Na ka bynta kito kiba ka GST kan ym treikam, ka jingbei tyngka lyngba ka jingai jingïarap kan long haduh T. 10.00 klur.
Baroh ki Unit kiba hab ha ka Zone A ha ki jylla ka thaiñ shatei lammihngi ki lah ban ïoh ïa ka Capital Interest Subvention ba kot 3% na ka bynta 7 snem lynter na kano kano ka tarik hadien jong ka tarik hadien jong ka jingaplai ïa ka registration hapoh jong katei ka scheme. Hynrei ka jingpyllait ïa ka pisa lyngba ka jingai jingïarap kan sdang tang ynda la sdang ka jingtreikam ha ka ban pynmih ïa ki mar.
Baroh ki Unit kiba don ha ka Zone B jong ki jylla ka thaiñ shatei lammihngi ki lah ban ïoh ïa ka Capital Interest Subvention ba kot 5% na ka bynta 7 snem lynter hadien ka jingphah ïa ka aplikeshon ban rejistar hapoh katei ka scheme. Hynrei ka jingpyllait ïa ka pisa kaba la bhah na katei ka jingai jingïarap kan long tang hadien ba la sdang ka jingpynmih nyngkong ïa kino kino ki mar.
