Shillong, Jylliew 21: Ka sorkar jylla ka la ithuh ïa ka mala ba shajrong jong ka Meghalaya Urban Development Authority (MUDA) kum ka jaka ban pynshong ïa kiba die madan bad la pynbna ruh ba baroh ka thaiñ Khyndailad kum ka jaka kaba ym shah ban die madan.
Ïa kane ka rai la pynshong nongrim halor ka jingmynjur jong ka Town Vending Committee.
Ka jingpynbna ba la pynmih da ka sorkar ka la kren shai ba ki bynta bapher bapher jong ka Khyndailad kum ka jaka bym shah ban die madan (‘no vending zone’).
Kane ka jingpynbna ba la pynmih da Chairperson of Town Vending Committee & Chief Executive Officer (CEO), Shillong Municipal Board ha ka sngi Saitjaiñ ka la bthah ba baroh kiba shong die jingdie ha madan kiba la ïoh ïa ki syrnot Certification of Vending (COVs) naduh ka 2 tarik u Jylliew haduh ka 19 tarik mynta u bnai, ban pynkynriah ïa ki jaka shong madan ka ban treikam naduh ka 22 tarik u Naitung.
“Namar kata katkum ki kyndon jong ka Meghalaya Street Vendors (Protection of Livelihood and Regulation of Street Vending) Scheme 2023, baroh kiba shong madan kiba la ïoh ïa ki COV la bthah ba kin leit shong noh sha ki jaka kumba la pynbna ha kaba kane kan treikam naduh ka 22 tarik u Naitung,” ong ka kyrwoh khubor.
“Katkum ka jingpynbna ba la pynmih da ka sorkar ha ka 26 tarik u Jymmang la ong ba baroh ki jaka jong ka Khyndailad la pynbna ba kan ym long shuh ka jaka ban die madan. Namar kata kino kino ki briew ki bym don ïa ka COV kiba die jingdie ha shi lynter ka surok Khyndailad ki dei mardor ban pynthylli ïa kitei ki jaka bad kumjuh ruh ba kin weng mardor ïa ki tiar ba ki die jingdie hapoh ka 3 sngi naduh ba la pynmih ïa kane ka jingpynbna,” ong ka jingpynbna ba la pynmih sha baroh kiba die madan ha Khyndailad.
Kane ka jingpynbna ka la kdew ruh ba ka Town Vending Committee ka la ai ïa ki Certification of Vending (COVs) sha baroh kiba die madan naduh ka 2 haduh ka 19 tarik mynta u bnai kiba ïaid lang ruh bad ki kyndon jong ka Meghalaya Street Vendors (Protection of Livelihood and Regulation of Street Vending) Scheme 2023 kaba pule lang bad ka Street Vendors (Protection of Livelihood and Regulation of Streed Vending) Act, 2014.
Lah ban pynkynmaw ba ha ki jingkren jong u Myntri ka tnat Jngohkai u Bah Paul Lyngdoh u la pyntip ba kumba 200 ngut kiba shong die jingdie ha madan kin shah pynkynriah na ka thaiñ Khyndailad.
Katkum ka jingong jong u ïa kane ka rai la shim ban pynlong ïa ka Khyndailad kum ka jaka ban ïaid ki paidbah bad kumjuh ruh kum ka jaka kaba lah ban khring ïa ka put ka tem bad kumjuh ruh ban pdiang ïa ki nongwan jngohkai sha Shillong.
