Ithamula ba wat ïa ka RP ba ki la pynrung ha ka Manifesto ki dang hap hikai ïa ki MLA : Ardent

Nongstoiñ, Jylliew 11: U President ka VPP u Bah Ardent M Basaïawmoit ha ka sngi Saitjaiñ u la kren pharshi ïa ka jingpynlong jingai jinghikai ka UDP ïa ka mat jong ka Reservation Policy (RP) sha ki MLA jong ka da kaba ong ba kane hi ka paw ba ïa kane ka mat la shu pynrung ha ka jutang elekshon jong ka tang ban khring vote.
“Ngi shuwa ban pynrung ïa ka mat kular elekshon ngi ïa kren bad pyrkhat sani bad ïatai bniah shuwa bad lada donkam ban ai jingshai shuh shuh sha ki kyrtong ngi leh shuwa ka elekshon namar dei da kine ki mat ba ngi leit sha u paidbah ban pan jingkyrshan na u ym kum kito ki party kiba lada peit i thamula pynban ba hadien ba ki MLA ki la shah jied ki dang donkam ban shim klas halor ka mat kaba ki la kular ban pyndep lada ki wan ha ka bor,” ong u Bah ardent haba kren ha ka jingïalang ka VPP ha Rambrai.
“Nga kwah ban ïathuh ïoh phim sngewthuh ba ka manifesto ka dei ka kular elekshon kaba ki party ki kular ïa u paidbah bad phi lah ban bishar ruh napdeng ki party kiba kular ïa ka mat elekshon mano ba shim khia ban bud dien ïa ka jingkular halor ban review ïa ka Reservation Policy bad ngi kum ka party ngim shym la randien na kaei kaba ngi la kular sha u paidbah ban pynkit pap pat sha u ba u jied tang 4 ngut ki MLA kumba don kiwei pat ki party kiba thet kti ban buddien ïa kane namar kim ïoh synshar marwei bad nalor kata ki pynkit pap pat sha u paidbah,” u la bynrap.
Haba pynphai nia ïa ka jingkynnoh na ka liang ki myntri sorkar MDa ba ka VPP kam shym la ai jingmut ïa ka jingdawa jong ka ban review ïa ka Reservation Policy u Bah Ardent u la ong, “Ki don ki myntri jong ka sorkar MDA kiba dei ruh ki nongai ktien jong ka sorkar ki kynnoh ba ngim shym la ai jingmut halor ka jingdawa jong ngi ban pynkylla ïa ka Reservation Policy hynrei la wanrah beit tang ka jingkwah ban review hynrei mynta nga kwah ban kren shai ba naduh ka sngi kaba nyngkong eh ngi la ong ba dei ban pynkylla ïa ka Reservation Policy kaba ïahap kat kum ka jingdon paod bad ban thung da ka Expert Committee ban peit bniah ïa kane bad kane ka la dei ka jingai jingmut kumno ban pynkylla,” u la ong.
“Ki don ruh ki kynhun kiba ha ka jaka ban snohkti lang bad ka jingdawa ban pynbeit thymmai ïa ka reservation Policy ki pyrshah pynban namar la sdang da ma ngi namar ki tieng ïoh ïoh burom ka VPP, na ka liang jong ngi lei ngim kwah burom ïa kane hynrei lada ka jop ka jingdawa kaba ngi sdang ka jingmyntoi kan dei ïa ki samla ka jaidbynriew bad ka jylla nga lyngngoh ba wat la ki tip skhem ba dei ka jaidbynriew ban myntoi ki pyrshah pynban,” u la bynrap.
Haba kren halor ka jingthung ka sorkar ïa ki Chairman, Co-chairman bad Vice Chairman bapher bapher jong ka sorkar da ki briew kiba rem elekshon bad ki nongtrei ka party bad ruh ki MLA ha ki board, ki council, coperation bad kiwei kiwei ki tnat ka sorkar u Bah Ardent u la ong ba kane ka dei tang ka jingbam duh ïa ka pisa u paidbah ban pynsngewbha ïa ki katto katne ki briew ba don ha jan ka sorkar.
“Da ki phew klur ka sorkar ka pynlut ban siew ïa ka tulop ïa ki briew kiba shu thung pynlut ksan ïa ka pisa u paidbah kibym wanrah jingmyntoi eiei ïa ka jylla, ban pynbiang ïa ki jaka pule ka sorkar kam ju don pisa, ban siew tulop ïa ki nonghikai kam ju don pisa hynrei ban siew ïa ka tulop ki Chairman, Co-Chairman, ki Vice Chairman ba thung da ki briew kiba rem elekshon ka sorkar ka don pisa beit bad kane kam dei shuh tang ka jingbam sap ka dei ka jingbam duh syndon,” u la ong.
“Ngi kum ka VPP ïalade ngin ym bam bad ïa ki wei ruh ngin ym ailad ba kin bam bad ha kine ki sngi ban wan ynda ka jingdawa pynbeit ïa ka Reservation Policy ka la urlong ngin ïakhih ban dawa ba dei ban weng lut ïa kine ki briew kiba bam duh ïa ka pisa u paidbah,” u la ong.
Na ka liang u Bah Adelbert haba kren ha kane ka sngi u la takraiñ tyngeh ïa nongïalam barim ka KHNAM uba dei ruh u nongseng jong ka da kaba ong, “Nga don bynta ban seng ïa ka KHNAM namar la pheil lut baroh ki party kumba ong une u nongïalam ka KHNAM ha kito ki por hynrei tang ha ki khyndiat snem u la leit ban pynïasnoh ïa ka kita ki party kiba la pheil,” u la ong.
“Hato ka mat ban dawa pynkylla ïa ka Reservation Policy kam dei mo ka mat ba la seng ïa ka KHNAM hynrei balei te ynda ngi dawa mynta phi kynthah nga kwah ban ong tang kane ka wei sngewbha buh ïa ka jaidbynriew ha khamt ym ïa ka party namar dei ma ngi ban shah kylli ha ki longdien aiu ngi la leh na ka bynta ka jaidbynriew,” u la bynrap.
U la ong ruh ba ka VPP kum ka jingkyrmen ïa ka jaidbynriew kan trei khlem man thait tad haduh ba ka jaidbynriew kan don ha ka jaka ba shngaiñ.