Isyier ba mynta la trei borbah ka ‘moneyfesto’ ban ïa ka ‘manifesto’- Bah Paul Lyngdoh

Shillong, Ïaïong 16 : U Working President jong ka UDP ba dei ruh u MDC jong ka Jaïaw, Bah Paul Lyngdoh u la ong ki isyier mynta ba ki paidbah ha ka jaka ba kin peit ïa ka manifesto lane ki mat treikam jong ki party pynban ki shah pynngop ha ka ‘moneyfesto’ lane ban shah thong ha ka pisa por elekshon.
Haba kren ïa kane ha ka jingïalang pynskhem ïa ki nongkitkam ba thymmai jong ka UDP Mylliem kaba long ha kane ka sngi Palei, u Bah Paul u la ong, “Ha kane ka juk ba ngi ïakren kumno ban pynkhreh noh ïa ka manifesto jongka party ka jongngi hynrei kiwei pat ki party ki ong ym donkam manifesto tang ka moneyfesto ka la biang hi.”
Shuh shuh u ong ruh ba dei na kane ka daw ba ki nongtrei jong ka party ki hap ban jop ïa ka mynsiem jong ki paidbah nongkyrshan khlem da donkam ban pynbiej ïa ki da kiwei pat ki rukom treikam.
Utei u MLA barim u la ong ruh ba kaei kaba la jïa ha u 2018 kam dei shuh ban dang ïai jia ha kane ka elekshon MLA 2023 ba ki paidbah ki la shah pynbiej da ka kynja song pisa ba 5000.
“Ha ka elekshon 2018 ki briew ki la shah buh dor da ka khlieh la jong. 5,000 tyngka ki ïoh kawei ka longiing ki la kmen palat bad ynda la dep ki kyndit bynriew bad ong ba ki la shah shet ha katei ka skim ba pyllait ha u 2017,” la bynrap shuh shuh u Bah Paul.
Nalorkata, u ong ruh ba ki paidbah naduh mynta ki dei ban kyndit bynriew noh khnang ba ka UDP kan ïoh ban synshar hi noh ym ban shu snoh ha footboard bad kumba ong mano re ba lada shah kynjat la poi shabar (footpath). “Ka la dei ïangi ban ñiah ïa ka kali. Ngin pyntikna ba ha u 2023 ka UDP kan ïalam nakhmat ban synshar ïa ka jylla.”
U Bah Paul u la ong ruh ba ka por ka la biang ba wat ïa ka bor synshar ym dei shuh ban aiwai thik kumba ai wai khiew ai wai pliang ha ka por khawai.