Hyderabad, Naitung 16 : Ban nang pynkhlaiñ ïa ka kynhun, ka Hyderabad FC kaba dei ka lahduh jong ka Indian Super League ka la dep ban soi pura ïa u Alex Saji u rangialehkai dien ha ka kontrak kaba bun samoi kaban sdang naduh ka samoi ïalehkai ban wan.
“Ka Hyderabad FC kadei ka team kaba plie lad ïa ki player dang khie jong ka ri bad nga dap shisha ka jingkmen kaba khraw ban don bynta lang bad kane ka club. Kadei ka rynsan kaba hehduh na bynta ki player kum manga. Nga da khmih lynti ban ïoh ïalehkai noh hapoh ka jingïalam u Manolo kum u coach bad ban ïoh jinghikai shuh shuh ban nang pynjanai ha ka jingïalehkai. Kan dei ka samoi kaba sngewtynnad bha, kan dei ka sien ba nyngkong ba ngan ïalehkai ISL, bad ngam lah ap shuh ban ïoh sdang noh,” ong u Alex Saji hadien ba u la dep ban soi ïa ka kontrak kaban neh haduh ka samoi 2024-25
U Saji uba dei na Wayanad, Kerala, u la sdang ka jingïaid lynti bad ka Red Star Football Academy. Hadien kane u la mih madan ha ka I-League na ka Gokulam Kerala bad u long shisha u rangïalehkai ba donsap. U Saji u la ïoh rah ruh arsien ïa ka nam lahduh jong ka I-League bad katei ka club (Gokulam Kerala). U Saji uba dei u rangapdien shapdeng uba lah ruh ban ïalehkai sha ka liang kadiang, u la mih madan 26 sien ha ka I-League bad u la sdang ruh ban mih madan ha ki jingïalehkai ba laisien bad ka Gokulam Kerala ha ka jingïalehkai group stage ba dang shen jong ka AFC Cup.
Hadien kane u la ïoh ban khring ïa kiba bun lyngba ki rukom ïalehkai jong u ha ka football hapoh ka ri, u la shah khot ruh sha ka kynhun U-23 jong ka ri India na bynta ka jingïakop knieh rung sha ka AFC U-23 Asian Cup. Bad mynta u Saji u la pynkhreh ban mih madan nyngong ha ka Indian Super League bad un don lang bad ka kynhun ba nyngkong bad ba un shah hikai hapoh ka jingïalam u Manolo Marquez ha ka samoi ïalehkai 2022-23.
