Rymphang 22: Ka jingïalehkai kaba kyrpang na u Lalrinzuala Lalbiaknia ka la ïarap ïa ka NorthEast United FC ba kan ïakhaid da 1-1 kol bad ka Bengaluru FC ha ka jingïalehkai jong ka lympung ISL 2025-26 ha Sree Kanteerava Stadium hynne ka sngi U Blei.
U Lalbiaknia u la ktah mardor hadien ba u la wan kum u nongbujli. Une u rangïalehkai na Mizoram u la lah ban tehlakam ïa ka bol pashat na u Asheer Akhtar, shuwa ba un pyrshang sha kol kaba la ïaid lyngba ïa u Gurpreet Singh Sandhu uba dei u nongap kol jong ka BFC.
Shuwa kane, ka kynhun kaba ïalehkai hala ïing, ka Bengaluru FC ka la ïoh ban pynkhihjar nyngkong lyngba u rangïalehkai ba shakhmat na Argentina u Braian Sanchez.
Kane ka jingïalehkai kaba la ïakhun hakhmat ki 13,623 ngut ki nongkyrshan, ka la sakhi ïa ki katto katne ki jingpyrshang thep kol kiba thikna na baroh ar tylli ki kynhun. Ka jingpyrshang da u Parthib Gogoi ha ka minit kaba sdang, kumjuh ruh na u M. Zibaco bad u M.S Jithin ka la pynkhie im ïa ka jingkyrmen jong ka NEUFC ha ka kylla miet.
Kane ka jingïakhaid ka la pynsah ïa ka NEUFC ha ka kyrdan ba 9 ha ka miej, da kaba kamai 1 point hadien ar tylli ki jingïakhun, katba ka Bengaluru FC ka la kamai 4 point hadien 2 tylli ki jingïalehkai ban wan ha ka kyrdan ba lai.
