Ishu Block-I & II: Dawa ka JJA ïa ka JHADC ban ujor ha SC pyrshah ïa ka Notification ka Assam

Jowai, Risaw, 28: Ka Jaiñtia Joint Alliance (JJA) kaba kynthup ïa ka WJSU bad ka JYF ka la phah da ka jingthoh sha u Chief Executive Member (CEM) ka Jaiñtia Hills Autonomous District Council (JHADC) lyngba ka Secretary jong ka Council, halor ka jingpynhap ïa ka Block I bad II sha ka jylla Assam ha ka jingpynbna (Notification) ba la pynmih ha u snem 1951 bad 1955.
Ha ka shithi ka JJA ka la dawa ïa ka JHADC ban pynïoh biang ïa kitei ki jaka kiba dei ki hok bad ka jinglong trai jong ki shapoh ka Meghalaya.
La ïathuh ha ka snem 1951, u Lat ka jylla Assam ula pynmih ïa ka jingpynbna ban pynphai ïa ka Block I bad Block II jong ka Elaka United Khasi Jaiñtia barim sha ka jingsynshar jong ka Elaka Mikir Hills bad la pynbud pat sa ha ka snem 1955 da kawei pat ka jingpynbna ka la pynskhem biang ïa kane ka jingpynbeit.
Shuh shuh kane ka jingpynhap ïa kitei ki Block lyngba katei ka Notification la leh khlem da aibor da ka Autonomous District Council, katkum ka paragraph 14 bad 18 jong ka Sixth Scheduled jong ka riti synshar ka ri India.
Halor kane ka jingpynkheiñ ïa ka riti synshar, ka Jaiñtia Joint Alliance (JJA) ka kyntu ïa ka JHADC ban mynjur ïa ka Resolution ha ka Dorbar ban wan, ban pynbna ba katei ka Notification 1951 bad 1955 ba la pynmih da ka Assam la leh khem da ïaid katkum ka riti synshar ka Ri.
La kyntu ïa ka JHADC ba ka lah ban mudui da ka mukotduma sha ka ïingbishar Supreme Court katkum ka kyndon 32 lane ka kyndon 131 jong ka riti synshar, ban ïoh bishar bniah bad ban pynkylla biang ïa kitei ki jaka.
Ka JJA ka la kyntu ruh ïa ka sorkar Meghalaya ba kan ai jingkyrshan ba pura ïa kane ka jingdawa.