Isangsot ïa ka Wah Umsohsun, watba la ker jar nar ruh dang ïoh bret ñuit pathar ki briew

By Mawphor Editor On Feb 10, 2026

Shillong Rymphang 09: Wat hadien ba ka tnat Shillong Municipal Board ka la dep ban ker noh da ki jar nar mynta lah bun snem khamtam eh ha kito ki jaka ba jur bha ka jingbret pathar ïa ki jaboh jabaiñ ha ki nala bad ki wah kiba don ha Nongbah Shillong, hynrei ka jingkhlem akor bad jingbym kheiñ snep jong ki katto katne ki nongshong shnong ka dang neh sah haduh mynta.
Ha ka jingleit jurip u nongthoh khubor la shem ba ka jingbret pathar ïa ki jaboh jabaiñ ha ki wah ka dang ïaibteng beit haduh kine ki Sngi.
Ïa kane la lap hapoh ka wah Umsohsun, kaba la kylla long noh mynta tang kum kawei na ki nala bah kiba don ha Nongbah Shillong, ha kaba la lap ba kane ka nala ha shilynter jong ka, ka la dap tang da ki ñuit, ki byrni, ki plastic, ki dieng lyngkhot kiba dei ki lyntang nalor ki bilor plastic bad kiwei kiwei ki jaboh jabaiñ.
Kane ka nala nalor ba ka um kaba tuid kadei kaba jaboh bha, ka tuid ruh shaduh ka Wah Umkhrah.
Watba la ïohi ba ha kane ka nala ka la don ruh ka jingker jar nar da ka tnat badei peit bad ka jingker jar nar ruh ka long kaba jrong bha hynrei ym lah shuh ban sngewthuh haduh katno ka rukom ba ki briew ki dang lah ban kawang bad bret ïa ki jaboh ha kane ka nala.
Watla ïohi ruh ba ki don bun tylli ki Ïing kiba don ha syndah kaba shilynter jong kane ka wah, ym lah pat ban tip mano ba ju mlien bha ban kawang bad bret ñuit bha ha kane ka wah Umsohsun ne ka Nala Umsohsun.
Lah ruh ban ong ba lada ym lah ban pynkhuid ne pyrkhing bha ïa kane ka jingbret pathar ïa ki ñuit na kine ki wah ne ki nala barit Kan long ruh kaba eh ïa ka Sorkar jylla ban pynlut kai da ki klur ha kawei na ki kompeni kaba ïoh ka kontrak ban shim ïa ka projek ban pynkhuid ïa ka Wah Umkhrah.
Kumta la donkam ïa ki bor pynïaid District ne ki bor badei peit ban leh eiei noh kloi ha shwa ba kane ka nala ha Umsohsun ne kiwei pat ki nala kiba don hapdeng ka Nongbah Shillong ba kin kylla long kum ki mini marten ka ban sa long pat ka daw ka ban sa pynjah noh syndon ka jingdon kane ka nala hadien habud bad kaba lah ruh ban ktah ia ka jingdon ruh jong ka Wahumkhrah, Shillong.