Isangsot ban peit ïa ka jingjaboh ka Wah Umkhrah, sahkut sa tang da ki dieng, lyntang bad ki seij

Shillong, Ïaïong 05: Ka jingkwah jong ka Sorkar Jylla ban pynkhie im biang ïa ka Wah Umkhrah bad kiwei pat ki wah kiba la jaboh bha hapoh ka Nongbah Shillong lehse kan dang long ka jingphoh sniew kaba dang jngai bha.
Watba la ïohi ïa ki jingpyrshang jong ka tnat Shillong Municipal Board ne ka tnat Pynroi Sor ne Urban Affairs kiba la shim ïa ki sienjam ban shu ker noh da ki jar nar ha shilynter ki jingdon jong ki rud wah kiba don ha kine ki wah khnang ban khanglad ïa kito ki briew kiba ju mlien bha ban wan bret ñuit pathar da kaba shu kawang na ki kali jong ki ha ki por mynmiet ne ha kano kano kano ka por bad kumjuh ruh ban khanglad ïa kito kiba ju mlien ban bret ñuit pathar da kaba shu ïaid lynti, hynrei kane ka jingpyrshang kam pat treikam pura bha namar la ïohi ba kine ki wah, khamtam eh ka Wah Umkhrah la lap ba ka jingjaboh ka dang kham sniew dur shuh shuh.
Kane ka wah mynta kumba la ïohi ba ym tang ki plastic, ki bilor plastic, ki jaiñ ki nep bad kiwei kiwei, mynta lah nang ïohi ba ki katto katne ki briew ki la pyndonkam ïa kane ka wah ban bret ne pyntuid ïa ki dieng ki seij, ki lyntang, ki taïar kali nalor kiwei kiwei pat kiba la iohi tyngkrein ba ki la sahkut hapdeng ka wah, khamtam eh ha kine ki sngi ba ka don ka jingtyrkhong jong ka suiñbneng.
Watba ha kine ki sngi la don ka jinghab jong u slap hynrei kane ka wah ka dang neh hi hapdeng ka jingjaboh jingktieh bad ka long kumba wan lum pynban ïa kitei ki dieng ki seij ki lyntang nalor kiwei kiwei pat ki jaboh.
Ha ki por ba la dep watla ka sorkar ka la mang da ki klur ban pynkhuid ïa kane ka wah bad la ïohi ruh ba ki la don kiba trei monsngewbha kiba la ngam hapoh kane ka wah ban pynkhuid hynrei kan long pat kaba eh than ïa ki ban shim ïa kane ka sienjam kaba khraw lada kim ïoh ki jingkyrshan na ki tnat sorkar kiba dei khmih.
Kumba la ïohi ba kane ka jingker jar nar ha shilynter jong ki Wah kiba la jaboh, watla ka la ïarap, hynrei kam pat lah ban wanrah jingkylla hapoh kine ki wah, namar kumba la ïohi ki jaboh jabaiñ ba la bret mynta kim dei shuh tang na surok imat wat na ki ïingsah jong ki briew kiba khlem pat don ki jingker jar nar.
Kumta lah donkam shisha ïa ka Sorkar Jylla lyngba ki tnat ba dei ba kin shim noh sa da kiwei pat ki sienjam haba ïadei bad ki jingthmu ban wanrah jingkylla bad ka jingkhuid jingsuba hapoh kine ki wah kiba don ha Nongbah Shillong.