Khliehriat, Nailur 05 : Ka East Jaiñtia Hills District ha kane ka sngi Nyngkong ka la snohkti lang bad ka Ri baroh kawei ban rakhe ïa ka sngi kyrpang ki nonghikai ha kaba u myntri ka sorkar jylla, u bah Kyrmen Shylla u la long kum u kongsan bad u Deputy Commissioner East Jaiñtia Hills District, u Abhilash Banarwal, IAS kum u symbud kongsan.
Haba kren kum u kongsan, u bah Kyrmen Shylla, u la ai ka jingkublei ba kyrpang ïa u Deputy Commissioner, ïa ki heh sorkar jong ka tnat ka pule puthi jong ka district, ïa ki Principal, ki Head master bad ïa baroh ki nonghikai bad ong ruh ba ki nonghikai ki dei kiba don ka bynta kaba kongsan kiba noh syniang shikatdei eh ha ka imlang ka sahlang bad ha ka ri hi baroh kawei, ki dei ruh kiba treishitom bha met bad mynsiem.
U Symbud kingsan, u Deputy Commissioner, u pynkynmaw ba ïa kane ka sngi burom iia ki nonghikai la jied ban pynlong ha kaba kum kane ka sngi kaba dei ka sngikha jong u Dr Sarvepalli. Radhakrishnan bad ong ruh ba ki nonghikai ki don ka bynta kaba ha khmat eh ha ka imlang ka sahlang bad ka kam nonghikai ka dei ka kam kaba donburom ha kaba ka imlang ka sahlang ruh ka ju phai khmat sha ki nonghikai ba kin ai ïa kaba bha tam bad u ai ruh ka jingiaroh ïa ka jingnoh syniang ki nonghikai ha ka imlang ka sahlang.
Kiba la ai jingkren ki kynthup ruh ka SDSEO Khliehriat, ka kong Perina Dkhar, u DSEO Khliehriat, u bah L.S.Lyngdoh, ka nonghikai kaba na Tluh Secondary School, ka kong Tasiana Kympat, B.A(Hons) B.Ed, kaba la ioh khur ruh ïa ka khusnam ‘District Award’ ha kane ka sngi.
Ha kane ka sngi, u bah Kyrmen Shylla, u la ai ïa ki khusnam sah kito ki nonghikai kiba kynthup ka kong Tasiana Kympat, kaba na Tluh Secondary School, ka kong Draitis Paslein, ka nonghikai jong ka Pala Upper Primary School, ka kong Rufina Kyndait, ka nonghikai jong ka Dkhiah Government L.P.
U Deputy Commissioner, u la ai ïa ki khusnam sha u bah Mondaystar Nongtdu, uba dei u nonghikai jong ka Sutnga Government U. P School, Sutnga, uba la ioh ïa ka nam kum u Best District Scout Master bad kumjuh ruh ïa ka khusnam Best Guide Captain la ai ïa ka Laxmi Sarkar, kaba dei ka nonghikai jong ka Star Public School, Lumshnong.Kiba la ïa don ryngkat ki kynthup u BMC Saipung Block, u bah O. Sumer, ka BMC Wapung Block, ka kong T.R. Challam, u Sub-Inspector of Schools, Khliehriat, u bah S. Gympad bad u Principal Jaintia Eastern College, u Dr P. Nongtdu.
