Shillong, Ïaïong 14: Ka Sorkar Meghalaya ka la ïoh pdiang ar tylli ki khusnam na ka Unique Identification Authority of India (UIDIA) ha ka Aadhaar Samavaad 2025 kaba kynthup ïa ka Award kum ka jylla kaba biang tam ha kaban leh ïa ka Mandatory Biometric Updates (MBU) na ka bynta ki khynnah bad ïa ka khusnam kum ka jylla kaba biang tam ha ka Verification ïa ka jingpynrung kyrteng Aadhaar kiba la heh ha ka rta.
Ka jylla ka la ïohpdiang ïa kane ka khusnam ha ka Aadhaar Samavaad 2025 ha ka jingïalang kaba la long ha ka 8 tarik u Ïaïong ha Bharat Mandapam Convention Centre, New Delhi.
U Deputy Secretary ka General Administration Department (GAD) ula pyntip ba kane ka jingïoh ïa kitei ki khusnam ka pyni ïa ka jinglah bha jong ka jylla ban pynkhlaiñ ïa ka jingshakri lyngba u Aadhaar bad ban pynthikna ïa ka jingpynrung kyrteng kaba thikna jong ki khynnah bad kiba la heh, ha kylleng ka jylla Meghalaya.
La ong ba ïa kitei ki khusnam kaba la ïoh da ka jylla Meghalaya, la leit ban shimti da u Bah Shai Kupar War u Nodal Offcer (Aadhar) General Administration Department (GAD) ka sorkar Meghalaya. U Commissioner & Secretary ka jylla Meghalaya uba long ruh u Nodal Offcer ka jylla uba peit ïa u Aadhaar, u Dr Joram Beda ula pynpaw ïa ka jingsngewhun bad jingsngewnguh halor ka jingïoh ïa kane ka jingjop.
“Kane ka jingjop ka pyni ïa ka jingtrei met bad mynsiem bad ka jingtrei shitom jong ka kynhun Aadhaar naduh na ki shnong ki thaw, ki ophisar ha ki District bad ki nongtrei ha ka liang Technical. Nga ai khublei ïa baroh kiba la donkti lang ha ka ban noh synniang sha kane ka jinglah ban trei bha,” ïathuh u Dr Joram Beda.
Ka GAD ka ïengskhem ha ka ban ïatrei ryngkat lang bad ka UIDAI bad ki tnad bapher bapher ban pynbha bad pynjanai shuh shuh ïa ka rukom treikam ha ka jingpynrung kyrteng Aadhaar ha ka jylla Meghalaya bad ban pynthikna ba man la ki nongshong shnong kin ïoh ïa la ka jingithuh kaba kyrpang (Unique Identity) bad ïa ki jingmyntoi bapher na ka sorkar.
