Jowai, Naitung, 25: Ka Khasi Jaiñtia Youth & Student Union (KJYSU) ka la ong ba ki mynder ki la ïohlad ban rung suk sha Meghalaya lyngba ki kam khaïi be-aiñ.
Hadien ka jingkhynra mynder kaba jur bha hapoh Assam, kumba la ïohi lyngba ki lad pathai khubor ka sorkar Meghalaya ruh ka la pynmih da ka hukum kaba bthah ïa ki baroh ki Deputy Commissioner jong ki district bapher bapher ban peitngor ïa ka jingwan rung tuh jong ki mynder.
“Ka seng ka ai jingkyrshan bad ïaroh ïa kane ka sienjam ba ka sorkar ka la shim. Hynrei kane ka jingpyrshang jong ka Sorkar Meghalaya kam don jingmut eiei lada kam shimkhia ban khanglad ïa ki kam khaii be-aiñ kiba jyllei hapoh ka jylla,” la ong u kyrwoh ba la soi da u President u Bah C. Phawa bad u General Secretary u Bah D. Shullet.
“Lyngba kine ki kam shalan mar be-aiñ ki mynder ki ïohlad bha ban rung sha ka jylla jong ngi, lyngba ka jingkhaïi masi be-aiñ, jingkhaïi mawshun be-aiñ bad kiwei kiwei ka pynsuk bad plie lad ïa ki mynder ban wan na Assam sha ka jylla jong ngi namarba bun hi kine ki mar ki wan beit na Assam, lyngba ka jylla Meghalaya pat ki pynpoi shapoh Bangladesh ïa kine ki mar lada ki masi ne kiwei kiwei bad ynda wan phai na Bangladesh ki wan ïalam lang ïa ki mynder,” la kam ka seng.
Ka seng ka la kyntu ïa ka Sorkar ban khang noh shi syndon ïa ki kam be-aiñ khnang ban khanglad ïa ka jingwan rung jong ki mynder, lymda kumta ka jingpyrshang jong ka Sorkar kan long lehnohei bad kan long tang ka jingpyndep rukom.
