Shillong, Rymphang 24: Ka Khasi Student Union ha ka janmied jong ka sngi Nyngkong ka la ïoh bat ïa ki 15 ngut ki bar jylla kiba dei ki Muslim bad ïa kane la lap da ka Khasi Students’ Union (KSU) Laban Circle bad ïa kine la lap ba kim dei ki trai jylla, bad la lap ba ki dei Muslim, kiba la sah be-aiñ khlem ki kot ki sla kiba biang bad khlem ka jingtip lane ka jingmynjur jong ka Dorbar Shnong.
Na ka liang ka seng ka la ong ba kine ki Muslim ki wan shane ban ïoh bylla bad ki sah ha kawei ka ïingwai ba 2 (kamra) ha Laban. Katkum ka jinglum jingtip na ka liang ka Seng, ïa kane ka ïingwai la ai sha 2 ngut ki briew ki bym shim sah shuh shane ha ki bnai ba ladep bad kine pat ki ai pateng ha kine ki 15 ngut ban shong beaiñ khlem jingtip jong ki trai ïing ne ïoh jingbit na ka shnong. Na ka liang ka Seng ka la kyndang mardor ïa kane ka ïing bad pynmih lut ïa baroh kine ki 15 ngut ba wan buhai shnong shane bad pynkit ïa kine ki khar muslim da ka kali sha Assam.
Ka Seng lyngba kane ka kyrwoh ka kwah ban pynkynmaw biang sa shisien ïa baroh ba katkum ka jing?alang ba la shong da ka Seng bad baroh 7 tylli ki Dorbar Shnong ba kynthup hapoh ka Rait Laban Dorbar Pyllun bad Dorbar Shnong Lawsohtun ha ryngkat ka jingïadonlang ki pulit jong ka thanad Laban ha 5 tarik u Nailur, 2025, ka la shim ïa ka rai ba nym shah shuh ïa ki bar jylla ban ïoh wai hapoh kine ki Dorbar Shnong khlem ïoh jingbit bad jingpynskhem na ki Dorbar Shnong.
Ka Seng ka maham jur ba ki trai ïing ki dei ban burom ïa kane ka rai bad kim bit ban leh pyrshah da kaba ai wai ïa ka ïing ka jong ki sha ki bar jylla. Lada lap nangne sha khmat ki trai ïing kin hap ban bah khlieh hi ïa kaei ka ban sa jia lada ki dang ïai ai ïing ïa ki bar jylla hapoh u pud u sam jong kine ki 8 tylli ki Dorbar Shnong, ong ka kyrwoh ba la phah da u Bah Shiningstar Chyne General Secretary KSU Laban Circle.
