Nongpoh, Nailar, 07: U Syiem ka Raid Marwet u Pa’iem Ken Syiem ryngkat u Bah Sosthenes Sohtun MLA ka Jirang mynta ka sngi ki la lum syndon da ka jingïalang ïa ka nongïalam shnong kiba hap ha ka Raid Marwet ha ophis u Syiem kaba don ha Baridua, ha ka jingdon ryngkat ki bor pulit na ka bynta ban ïakren bad mir jingmut ha kaba ïadei bad ka jingkyndang jong ka jylla Assam ïa ka briew ba sah beaiñ bad ka jingma kaba ap ïa ka jylla Meghalaya khamtam ki shnong khappud ba don ha syndah bad ka Assam.
Ha katei ka jingïalang ki Rangbah Shnong ki la ïoh ban pynpaw ïa ka jingsngew jong ki halor kane ka jingïaid shaphrang ka Assam ban kyndang ïa kaba sah beaiñ bad kumno ki shnong ki dei ban long peitngor khamtam ha kaba ïadei bad jingwan buhai shnong ki briew ba nabar ban lait na ka jingma bad ktah ïa ka shongsuk shongsaiñ jong ki shnong ki thaw.
Haba kren sha ki lad pathai khubor na ka liang u Syiem ka Raid Marwet u Paiem Ken Syiem u la ong ba ka Raid Marwet ka dei ka jaka kaba bun bha ki ba shongkha khleh bad ka dei ka kamram jong uwei pa uwei u nongïalam shnong ban don ka jingkitkhkieh ïoh wan rung ki briew nabar ki bym ithuh ithaw bad maham ruh ïa ka nongïalam shnong ban phikir namar kitei ki bar jylla ki lah ban wan ha kiba bun ki rukom ban trei bylla, ban shongwai bad kumta ter ter.
U la ong ruh kaba kham ma shuh shuh ka long ïoh ba kitei ki bar jylla ki lah ban wan kum ki nongshongkha ban pynbiej ïa ka khun samla trai muluk tang ban ïoh bsuh khlieh bad ban ïoh long trai ha kane ka jylla.
Na ka liang u MLA ka Jirang u Bah Sosthenes Sohtun u la ong ba ka Raid Marwet ka don ha khappud bad ka Assam bad ngi don ka jingkhuslai bad ka jingsngew syier bad lada ngim lah ban tehlakam ha kane ka por mynta ka long kaba ma ïa ka shnong ki thaw ba wat ka shongsuk shongsaiñ, kumta u la kyrpad ïa ka nongïalam shnong ban long kiba peitngor khamtam ki nongïalam shnong ki tip kham bha kino ki briew kiba wan thymmai bad kadei ka jingkitkhlieh jong ki ban talasi ïa ka briew ba wan thymmai khnang ba kan nym don kano kano ka jingïoh bsuh khlieh bad ka jingthud ïa ka shnong ka thaw.
