ïoh umdih ki 71 tylli ki longïing, jop ka jingpyntrei ïa ka skhim JJM ha Pyndendiwah

Mawkyrwat, Naiwieng 11: Kum shibynta ban buddien halor ka jingpyntrei ïa skhim umbam umdih na ka Jal Jeevan Mission (JJM) ha ka jinglut kaba kot kumba T. 62 lak tyngka bad ba la pyndep ha ka 8 tarik mynta u bnai ka ophis treikam jong u Executive Engineer, PHE jong ka Mawkyrwat Division hapoh ka jingïalam jong u bah K. Nongbsaw uba dei u Executive Engineer ha ka sngi Baar ki la hiar jurip ïa ka shnong Pyndendiwah ka shnong kaba hapoh ka South West Khasi Hills District ban pynthikna ïa ka jingpyntrei kam la ka biang ne em kumba la pyndep.
Ha kane ka jingjurip la lap ba ka jingpyntrei ïa ka skhim umbam umdih lyngba ka JJM hapoh ka shnong Pyndendiwah ka la long kaba jop namar kumba 71 tylli ki longïing ki la ïoh ïa ka umbam umdih kaba biang bad kaba kynthup ïa ki ar tylli ki skul Upper Primary School, saw tylli ki skul Lower Primary School, kawei ka Secondary School bad ka Aganwadi Centre.
Kane ka shnong ka la ïoh ruh ïa ka jingithuh kum ka Har Ghar Jal Village ha kaba baroh ki longïing longsem bad ki jaka ai jinghikai ki la ïoh ïa ka umbam umdih kaba paka kumba la mang.
Haba ai jingkren ha kane ka sngi, u Executive Engineer, PHE jong ka Mawkyrwat Division, u bah K. Nongbsaw u la pynpaw ïa ka jingsngewkmen kaba khraw ban ïohi ba ka jingpyntrei ïa ka skhim umdih umdih na ka JJM ha ka shnong Pyndendiwah ka la long kaba jop namar baroh ki longïing longsem ki la ïoh shisha ïa ka jingmyntoi lyngba kane ka skhim JJM.
Katba ha ka jingai jingkren na ki katto katne ki nongïalam shnong bad ki paidbah ki la pynpaw shisha ïa ka jingkhublei kyrpang ïa u u Narendra Modi uba dei u Myntri Rangbah duh ka Ri India uba la pynïoh ha ki paidbah nongshong shnong ïa kane ka skhim umdih umdih. Ha kajuh ka por ki la ai khublei ruh ïa ka ophis jong u Executive Engineer PHE Mawkyrwat Division ïa kaba ki la pynbit pynbiang ïa ki jingdonkam baroh ha kaba ïadei bad ka jingpyntrei ïa kane ka skhim kumba la bhah da ka sorkar India.
Kiwei de kiba la ïa donlang ki long u bah I. Kharbudon, SDO PHE Mawkyrwat Sub Division bad bah P. Myrthong, G.E incharge lem bad ki nongtrei hapoh ka ophis u EE, PHE Mawkyrwat Division.