ïoh u bah Hally War ïa ka khusnam Padma Shri 2026 ba pynneh pynsah ïa ki Jingkieng Jri

Shillong, Kyllalyngkot 25: U Bah Hally War na ka Jylla Meghalaya uba im ha ka rep ka riang bad pynneh pynsah ïa kiei kiei ki sawdong sawkun jongka mariang, ula ïoh ïa ka Khusnam Padma Shri 2026 ha ka jingtrei mon sngewbha ban pynneh pynsah ïa ka jinghikai u mynbarim kata ban pynneh pynsah ïa ki Jingkieng Diengjri. ka khusnam kaba heh tam hapoh ka ri ban ai burom ïa ki nongshong shnong bad une u rangbah u la ïoh namar u la ïai im ka jingim baroh shilynter ban pynneh pynsah ïa ki Jingkieng Jri.
U Bah War, uba la don 67 snem ka rta uba na ka Shnong Siej na ka thaiñ Sohra, kaba hap ha East Khasi Hills, ula ïoh ïa ka jingithuh ïa ka kam kaba ula leh ha kaban thaiñ ïa ki jingkieng diengjri, kaba dei ka jingleh tynrai ha ka thaiñ.
Ka jingnoh synniang u Bah War ka dei kaba la ïoh jingithuh hapoh jong ka “People’s Padma” ka sienjam kaba thmu ban ai burom ïa ki riewshlur kiba la noh synniang radbah bha sha ka imlang sahlang.
Ki kam ki jongu ha kaban pynneh pynsah ïa ka jingthaiñ tynrai ïa ki jingkieng diengjri ka dei kaba la ïoh ïa ka jingïaroh bad jingithuh kum ka jingnoh synniang kaba kordor ha ka kolshor ba riewspah barim bajah jong ka ri India.
U Bah Hally War ula ïoh ïa ka jingithuh halor ka jingtrei kaba shi lynter ka jingim ka jongu ban pynneh pynsah ïa ka jingkieng diengjri, kaba dei ka nuksa kaba phylla ban ïada ïa ka mariang bad kumjuh kaba la tip kum ka Bio-Engineered Heritage.
Ka khusnam Padma Awards, kadei kaba la sam ha ki 3 tylli ki kyrdan kaba kynthup ïa ka Padma Vibhushan, Padma Bhushan bad ka Padma Shri, ïa kine la pynbna man la ka snem ha ka jingrakhe ïa ka Republic Day ban ai jingithuh ïa ka jingtrei bad jingnoh synniang kaba radbah ha ki bynta ki bapher bapher kaba kynthup ïa ka Art, Social Work bad Medicine.
Mynta u snem, ki don 131 ngut ki riewshimet kiba la shah jied ban ïoh ïa kitei ki khusnam, ha kaba 5 ngut kin ïoh ia ka Padma Vibhushan, 13 ngut ïa ka Padma Bhushan bad 113 ngut kin ïoh ïa ka khusnam Padma Shri.
ïa kitei ki khusnam yn aiti da ka President ka ri India ha ka jingïalang ka ban long ha Rashtrapati Bhawan ha u bnai Lber ne Iaiong man la u snem.
Halor kane ka jingïoh khusnam u Bah Hally War, na ka liang u Myntri Rangbah ka Jylla u Conrad K. Sangma ula pynpaw “U Bah Hally War u long u nongrah Tiensyiem ba shisha ïa ka spah jong ka jingdon jingem kaba naduh hyndai hynthai, ka riti dustur tynrai bad ka jingleh ban pynneh pynsah ïa ki jingkieng diengjri”.
Ula pynkynmaw ïa ka por ba ula leit sha ka shnong Siej ha East Khasi Hills ha kaba u Bah War ula sdang ban thaiñ ïa ki jingkieng diengjri naduh ka rta kaba u dang dap 10 snem.
U Myntri Rangbah ula pynpaw ba u burom bha ïa ka mariang, ïa ka jingstad tynrai bad ïa ki nongïalam ha ki shnong ki thaw.
Haba pynpaw ïa ka jingsngewkmen bad sngewnguh halor kane ka jingïoh ïa kaneka khusnam u bah Hally War u la ong “ Nga dei tang u nongrep uba rep ïa ki kwai, ki tympew, u soh marit, ki soh ba bunjait, ha kaba nyngkong eh nga ai nguh ïa U Blei halor kane ka jingïoh ïa kane ka khusnam. Nga dap da ka jingkmen kaba khraw ïa ki briew kiba la jied ïa ka kyrteng jong nga ban ïoh ïa kane ka khusnam”.