Shillong, Naitung :U Superintendent of Police ka EKHD, Shillong da kane u pyntip ba ha ka 14 tarik mynta u bnai ha ka por kumba 1:30 mynstep, la lapdien ïa kawei ka metïap jong u briew bym lah ban ithuh ka ba thiah lyngktar hajan ka jaka ïeng bus ha Khyndai Lad (Police Bazar), Shillong.
Hadien kane la pynkynriah noh ïa ka met shapoh Civil Hospital Shillong, hynrei na ka liang ki doktor ki ba khmih ki la pynbna ba u la dep khlad. Ha kane ka juh ka sngi la pyndep ïa ki jingdonkam baroh katkum ka aiñ bad la aiti ïa kane ka met ïap sha ki bor ba dei khmih jong kane ka hospital na ka bynta ban pyndep ïa ka post mortem, bad hadien la pynkynriah noh ïa kane ka met sha ka jaka buh met ïap jong kane ka hospital na ka bynta ka jingpynithuh bad wan shimti.
Une u briew u dei u ba la don kumba 45-50 snem rta, ka ryngïeng kumba 5.3 phut, u ba pyllun dur bad phong da ka sweat shirt ka ba grey bad blue bad ka patlun iong bad ki canvas thoh ïong thohlieh. La kyntu ïa ki ba haïing hasem bad kiwei pat ki ba don jingïadei bad une u rangbah ba kin sngewbha ban phone mardor shapoh police contral room na ka bynta ka jingwan shimti ïa kane ka met ïap ha kine ki nombor: 0364-2222214 / 2222215.
