Khliehriat, Naitung 21:Na ka liang u Superintendent of Police ka Eat Jaintia Hills District, Khliehriat da kane u pyntip ba u la ioh ia ka jingtip lyngba u Waheh Shnong jong ka shnong Um-im Umtyra , u Hunlang Bareh ba ha ka 19 tarik mynta u bnai kila lapdien ia kawei ka met iap jong ka kynthei bym lah ban ithuh ka ba la don hapdeng ka rta 30-35 snem ka ba thiah lyngktar ha kawei ka nala ka ba don ha rud ka surok NH-06 kumba 4 km na ka shnong Umtyra.
Hadien ba la bishar bniah bad pyndep ia ki jingdonkam baroh ia kane ka met iap la pynkynriah noh shapoh Khliehriat CHC na ka bynta ban leh ia ka Post Mortem Eaxmination bad hadien la pynkynriah sha ka jaka buh met iap jong kane ka CHC.
Kino kino ki ba don jingtip ha ka ba iadei bad kane ka briew ki lah ban aijingtip sha ka e-mail ID: sp.ejh-meg@nic.in. Kane ka briew bym tip kyrteng ka don ka rynieng kumba 4 phut, ka ba pdeng briew bad ka phong da ka phrok lieh ka ba don dak blu bad rongktieh, u rosary ronglieh u ba don ia u diengphna dieng bad ki jingdeng ksiar rupa.
