Shillong, Risaw 26: Ka kynhun jong ka State Disaster Response Force (SDRF) ha ka sngi Saitjaiñ ka la ïoh ban tam ïa ka metïap jong u rawon ba la 50 snem ka rta, uba ngam jyllop hapoh ka wah Umkhen ha ka shnong Jaroit, East Khasi Hills.
Katkum ka kyrwoh khubor la ïathuh ba une u rawon u dei u nongshong shnong ka Pdengshnong, Nonghali, uba la jah ha ka jingleit khwai sha wah Umkhen. La ong ruh ba une u rawon u dei uba la ithuh kyrteng da u Bah Kellshon Shadap, kurim i kong Sibonda War.
Halor kane ka jingjia, ka kynhun SDRF ba la ïalam da u Sub Inspector Bah D K Kharbhuh, ki la hiar sha kane ka wah ha ka por 7 baje mynstep bad kila hiar sharum ban wad ïa ka met da kaba pyndonkam ïa ki sainar shah bad ngam ruh shapoh ka wah.
La ong ba hadien shiteng kynta ba khwai da u sainar shah, ka kynhun ka la ïoh bat ïa ka met bad tam ïa ka napoh ka wah, ong ka kyrwoh khubor ba la phah da u Bah P H Shylla, Senior Staff Officer & Addl. PRO Directorate of Civil Defence & Home Guards, Meghalaya, Shillong.
