Nongstoiñ, Jymmang 28: Ki samla bad ki nongsynshar shnong jong ka shnong Riangdo, ki la pynpaw ïa ka jingkmen bad ong ba ka thaiñ Mawshynrut, ka la mad ïa ka jingkyrkhu ha ka liang ki kam ïalehkai sport na ka jingïoh ïa ka madan Artificial Turf ne madan phlang plastic.
La ong ruh ba la mang tyngka da ka sorkar haduh 8 klur tyngka na ka bynta kane ka madan bad ïa katei ka madan Artificial Turf la shna ha madan Riangdo. La ïohi ruh ba ka jingpyntrei ïa katei ka madan ka la sdang ïaid shait shait mynta la kumba katto katne bnai ei ei.
Haba ïadei bad katei ka bynta, la ïoh ban ïakren ruh bad ki nongïalam ka Riangdo Youth Sport Social and Cultural Association (RYSSCA) ba kynthup ïa u President kata u Bah Hamarbamut Synshiang, u bah Bah Breswell Paliar Vice Chairman ka shnong Riangdo bad kiwei kiwei, kiba la pynpaw ka jingsngew kmen halor ka jingïoh ïa ka Artificial Turf ha Riangdo. Ki la ong ruh ba katei ka Artificial Turf ka dei ka jingangnud ba la slem jong ki riew rangbah bad ki samla jong katei ka thaiñ.
La ong shuh shuh ba ïa ka jaka ban tei ïa katei ka madan Riangdo la ïarap lem ban pynsiew lem ïa ka ram da u Bah Methodios Dkhar naduh ka por ba utei u MLA um pat long MLA kum u nongmihkhmat jong katei ka thaiñ.
Haba pyrshang ban lum jingtip shaphang ka mang tyngka na ka bynta kane ka madan, la ïoh jingtip ba ka sorkar ka la Re Estimate biang na ka 8 klur ban ai kham heh shuh shuh ka song pisa. Hynrei haduh ba thoh ïa kane ka khubor ym pat lah ban tip la ka dei katno.
