Mawkyrwat, Lber 10 : Ka longkmie Anjellos Lyngkhoi kaba la kynjoh 50 snem ei ei na ka shnong Ngunraw, South West Khasi Hills District ka shnong kaba jngai kumba 27 kilometres eiei na Mawkyrwat District Headquarter ka la pynpaw ka jingaikhublei bad sngewnguh ïa ki Doktor, ki Nurse bad baroh ki nongtrei hapoh ka Civil Hospital, Mawkyrwat, South West Khasi Hills District kiba la lah ban sumar bad pynïoh jingkhiah na ka jingpang kaba don ha ka met jong kane ka longkmie.
Haba kren ha ki lad pathai khubor, ka longkmie Anjellos ka la pynpaw ka jingsngewkmen kaba khraw ba hadien ba ka la ïoh jingtip ba ïa ka jingshitom la lap noh ha ka por kaba biang lyngba ka jingshah sumar jong ka hapoh Civil Hospital Mawkyrwat. “Ka jingshitom ha ka met jong nga nga katkum ka jinglap ne sngewthuh ka la long naduh u bnai Ïaïong jong u snem 2024”, ïathuh ka longkmie Anjellos Lyngkhoi bad hapdeng kata ka jingpang ka la pyrshang ban wad jingsumar na kiwei de ki Doktor hynrei kam shym la ïarap ei ei.
Kumta lyngba ka jingmut ki para shnong ba kan leit pyrshang ne shim dawai bad phah symar noh ban leit ha u Dr. D. Suting uba don ha Civil Hospital Mawkyrwat bad ka la kohnguh ban leit bad la ong ba ha kane ka jingleit jong ka na ka liang u Dr. Suting ruh u la shimkhia da kaba u phah ban leh ki test ha Shillong bad mar kumta hi ka longkmie Anjellos Lyngkhoi kam shym la pynslem bad ka la leit bad ha ka jingleit pyrshang jong ka ha une u Doktor ki sa lap ba don u khñiang jingpang uba ki khot u ‘Cyst’ hapoh ka met.
“Ha ka 6 tarik u Lber, 2025 la puit ïa nga, bad ki la sei ïa uta u khñiang jingpang ‘cyst’ uba khia haduh 5.7 kg (32×22 cm) na ka met jong nga”, ïathuh ka longkmie Anjellos bad naduh ba la weng ïa une u jingpang, nga la sngewpher ba la kham sngewstieng ka met ka phad.
Ka Kong Anjellos Lyngkhoi kam lah khlem da pynpaw ka jingaikhublei na ka bynta u Dr. D. Suting uba la shimkhia ban sumar ha ryngkat ki nongtrei hapoh ka Civil Hospital Mawkyrwat. Ym tang kata ka la ai mynsiem na ka bynta ki paidbah kiba donkam ki lad jingïarap ba kim dei ban don ka mynsiem jong ka jingartatien ban wan shah sumar hapoh ka Civil Hospital Mawkyrwat hynrei ki dei ban donkam mynsiem jong ka jingshaniah bad aiti lut ha ka jingsumar jong ki.
Haba ïa kren pat bad u Dr. D. Suting uba dei u nongsumar ïa ka longkmie Anjellos Lyngkhoi u la ïathuh ba ka jingsumar ka la long kaba jop bad kam shym don kano kano ka jingthut ryngkat ka ïatreilang jong ki para nongtrei kumjuh ruh ka jingaiti bad jingshaniah tylli jong ka nongshah sumar.
