Shillong, Jylliew, 29: Ka kynhun Search and Rescue Team jong ka tnat Fire and Emergency Services na Shillong kiba la ïoh ïa ka jingpan jingïarap na ki Pulit jong ka Umsiang Out Post ki la hiar sha ka shnong Umsiang, ha kaba ki la ïoh sei ïa ka met jong uwei u nongsharai masi ïa uba la tip kum u Sofikul Ali uba la 35 snem ka rta na ka shnong Kahi Kuchi, kaba hap hapoh ka Kamrup District, Assam.
Katkum ka jingtip ba la ïohlum, la ïathuh ba une u nongsharai masi uba dei u nongshong shnong jong ka jylla Assam u la ngam jyllop katba u dang pynjam na shiliang sha shiliang ïa ki masi lyngba ka wah Umsiang ha ka 24 tarik mynta u bnai. Hadien kane ka jingjia, ka kynhun State Disaster Response Force na ka Jylla Assam kam shym la lap satia ïa ka met jong une u nongsharai masi wat hadien arsngi ba ki la wad, kumta ki la pyntip sha ki Pulit jong ka Umsiang Out Post ha kaba ki la pan jingïarap na ka kynhun Search and Rescue Team jong ka Jylla Meghalaya.
Dei lyngba ka jingïarap jong ka kynhun Search and Rescue Team na ka Jylla Meghalaya ki la lap ïa ka met jong u nongsharai masi hapoh ka 2:00 baje noh sngi ka sngi Saitjaiñ hadien ba ki la sdang ïa ka jingngam um naduh ka por 10:30 baje mynstep.
Hadien kane, ïa ka met jong une u nongsharai masi la aiti noh sha ki bor Pulit jong ka Jylla Assam na ka bynta ban leh katkum ki kyndon jong ka aiñ.
