Ïoh rah lypa ka Mawlai SC ïa ka nam lahduh jong ka SPL 2021-22

Shillong, Nailur 09 : Ka Mawlai SC ka la ïoh rah lypa ïa ka nam lahduh jong ka lympung ïalehkai OC Blue Shillong Premier League (SPL) 2021-22 bad ka dang sah sa laisien ïalehkai hadien ba ka Langsning FC bad ka Rangdajied United FC ki la ïakhaid da 1-1 kol ha ka jingïalehkai ha ka sngi Thohdieng ha madan Third Ground, Polo, Shillong.
Ka Mawlai ka kamai 29 poiñ bad tam da hynñiew poiñ ïa ka Langsning bad Rangdajied kiba baroh ar tylli ki kamai mar 22 poiñ bad sah sa arsien ïalehkai.
Watla ka la mih madan nyngkong ban ïashim bynta ha ka lympung ïalehkai football ba hehduh hapoh ka jylla ka OC Blue SPL hadien ba ka la kiew kyrdan na ka First Division, hynrei ka Mawlai ka la lah ban ïalehkai bha ha kaba ka la jop khyndai sien na ki 11 sien, ïakhaid arsien bad shah thep tang lai kol.
Haba mih madan ha ka sngi Thodieng, baroh ar tylli ki team ki kamai mar 21 poiñ hynrei ka Langsning ka don ha ka kyrdan kaba ar da kaba tam kol hadien ba ka la jop da 2-1 kol ha ka jingïalehkai ha ka 27 tarik Naitung. Bad lyngba ka jingïakhaid bad ka Rangdajied ka Langsning ka dang bteng ha ka kyrdan kaba ar.
Ha katei ka jingïalehkai, ka Langsning ka la shah thep kol ha ka jingïalehkai jong ka kylla step kata ha ka minit ba 20 ba la thep da u Raikutshisha Buam.
Watla ka la ïakhun tyngeh ban pynphai kol hynrei haduh kaba kut jong ka kylla step ka Rangdajied United FC ka la lamkhmat da 1-0 kol.
Haba wanphai sha ka jingïalehkai jong ka kylla miet, ka Rangdajied ka la hiar ka jingïalehkai hadien ba ka la pynshong ben ïa u Knerktilang Buam ïa kaba la pynmih bujli da u Wallambha Kharpran.
Ki minit ïalehkai ki dang ïaid shakhmat, baroh ar tylli ki kynhun ki la ïakhun tyngeh bad ïakhluit bha ha kaba ka Langsning ka la hap ban ïalehkai tang 10 ngut hadien ba u Sun u la shah ai red card.
Kumta ka la nang ai mynsiem ïa ka RUFC ha kaba ka la ïoh ruh ka kabu ban thep kol kaba la lyngba nyngkong lyngba u Dibormi Kassar uba la pyndei da ka khliehbad kaba ar lyngba u Donboklang Lyngdoh uba la khyrwit na poh box hynrei baroh ar tylli ki la lait noh sharud ka dieng kol.
Watla ka Langsning ka la hap ban ïalehkai tang shiphew ngut hynrei ka khlem duh mynsiem bad ïakhun tyngeh beit triang ha kaba ka la ïoh ban wanphai da kaba pynïakhaid ha ka minit ba 78 ba la thep da u Ronney Kharbudon.
Haduh kaba kut ka jingïalehkai watla baroh ar ki la ïakhun tyngeh pynban ki la hap ban hun ban ïasam mar shi poiñ. Mynta ka sngi Saitjaiñ ka jingïalehkai kan long hapdeng ka Mawlai (29 point) pyrshah ïa ka Ryntih SC (17 point) kaba dei ruh ka jingïalehkai derby. Watla ka la ïoh rah lypa ïa ka nam lahduh, hynrei ka Mawlai kan hap ban ïakhun tyngeh pyrshah ïa katei ka kynhun kaba dei na kajuh ka shnong khnang ba kan lah ban pyndep ïa ka jingïalehkai ba khlem mad nam rem shisien ruh. Kitei ki ar tylli ki kynhun ha ka jingïalehkai jong ka kylla kaba nyngkong, ka Mawlai SC ka la pynliem da 5-0 kol pyrshah ïa ka Ryntih SC.