Ïoh pynlong ka St. Edmund’s College ïa ka ALL EFF, ka sien nyngkong ha ka thain Shatei Lammihngi

Shillong, Nailar 09 : Ka All Living Things Environment Film Festival 2025, ha ka jingïatreilang bad ka Saura Mandala Foundation kumjuh bad ka St. Edmnund’s College, Shillong ka la ïoh ban pynlong ïa ka prokram bishar kaba shisngi ïa ki phlim bapher bapher ha ka 05tarik mynta u bnai kaba la pynlong ha College Auditorium.
Lah ban kdew hangne ruh ba kane kadei ka sien kaba nyngkong ba ka ALT EFF kan pynlong ïa ka jingbishar ïa ki phlim ha ka thain shatei lammihngi ka Ri India.
Ha kane ka sngi la sakhi ruh ïa ka jingshim bynta kaba shitrhem bha na palat 200 ngut ei ei ki paidbah kata kynthup lang naduh ki samla pule, ki nonghikai na ki college bapher bapher, ki seng bad khamtam na ka College kaba pynlong ïa kane ka prokram.
Ka jingbishar ïa kine ki phlim ka dei naduh ki phlim kiba ïadei bad takhuh bad ka mei mariang bud pat sa ka jingïasyllok bad ki samla pule kaba la nang pynshongkun shuh shuh ïa ka prokram katkum ka phangpdeng kaba ïadei bad ka mariang.
Na ka liang u Principal ka St. Edmund’s College, Br. Sunil Britto u la ai ka khubor kaba khlain bha ban banjur ïa ka jingdonkam ban pynneh bad sumar ïa ka mariang bad ong ba kane kan urlong tang baroh ki snohkti lang.
Ïa ka jingïalang ha kane ka sngi la pynïaid da ka Priyanka kaba dei ka nongmihkhmat na ka ALT EFF.
Kane ka jingïalang ka long ruh kum ka rynsan na ka bynta ka jingïatai kaba shongshit bha hynrei kaba jylliew na ka bynta ban ïoh ïa ka lawei kaba don jingkyrmen.