Jowai, Lber 08 : Ka Synjuk ki Waheh Chnong Jowai ha ka jingïalang ka jong ka, kaba lashong mynta ka janmiet ka 06.03.2025, ha Yungwalieh ka Durbar Shnong Loompyrdi Ïongpiah, Jowai, ka la pynthymmai ïa ki Nongkitkam jong ka, na ka bynta ka snem treikam jong u 2025-2026.
Ha shuwa ka jingïalang pynthymmai nongkitkam, ladon ka prokram lyngkot ban pynkup burom ïa ka samla Ridamaya Passah kaba la ïoh ïa ka Sunsilk Mega Miss North East 2024 bad ba la mihkhmat na ka bynta ka Ri India sha Turkey ban ïakhun ïa ka Top Model of Universe 2024.
Ka Ridamaya Passah, kadei ka khun jong ka Nira Passah, ka nongshong shnong ba pura jong ka Loompyrdi Ïongpiah, Jowai, ha ka kyntoit Khlieh-aitnar. Ha ka jingïakop na ka bynta ka Top Model of Universe 2024, ka khlem poi sha ka thong, tangba ka la ïoh rah ïa kawei ka nam ba kyrpang kum ka Best Face ha kata ka ïakop.
Ïa ka jingïalang la pynïaid da u President ka Synjuk, ma Jlan Kupar Rymbai uba la ai ïa ki kyntien pdiang burom bad la pynbud ka jingkren na u Riquoma Rq. Laloo, General Secretary ka Synjuk.
Ka Synjuk ha kane ka sngi ka la punkup burom shuwa ïa u Nongñiah ïa ka Ambulance ka jong ka, u Samewan Roy Rymbai, kum u nongñiah badon akor donburom bad batrei hok ïala ka kam. La ai burom ha u Samewan da u Vice President ka Synjuk, Shri Embhahlang Lyngdoh ïs ka Certificate bad ka song pisa ba sanhajar tyngka. Hadien nangta la pynkup burom ïa ka Ridamaya Passah da u President ka Synjuk, ma Jlan Kupar Rymbai.
Ha ka jingkren u ma Laloo, kum u General Secretary, u la ïathuh lyngkot shaphang ka jingïaid lynti ka Synjuk haduh ba la pynkhreh ïa kane ka jingpynkup burom. U la ong ba, ka synjuk ka sngewkmen shikatdei eh, ba ki khun ka Ri Jaiñtia khamtam kiba shong basah ha ka shnong Jowai hapoh u pud u sam ka Synjuk ki Waheh Chnong Jowai, ba ki lah ban warah ïa ka nam ka burom, ymtang ïa ki ïalade, hynrei ïa ka ïing ka sem, ka shnong ka thaw bad ka Ri hi baroh kawei.
U la pynshai ruh ba ka synjuk ka khlem pynkup ïa kum kine ki burom ïa ki ïakop badei tang hapoh India, hynrei ka shim beit ba, kino kino kiba la lah ban mihkhmat na ka bynta ka Ri India shabar jong ka, ka Synjuk ka pdiang ban leh ïa kane. Tangba ka shithi pyntip kadei ban poi na ki Waheh Shnong jong ka shnong ba ki shong ki sah, lym kumta, ka synjuk kamlah ban pdiang. U ai ki kyntien kyrkhu khyrdoh ïa ka samla Ridamaya ba kan lah ban jam shuh shuh shaphrang ha kino kino ki jingthmu ki jong ka, kaba long kawei ka nuksa ïa kiwei ban ym kynran dien ïa kaba la mang. U la ong ruh ba ka synjuk ka la shim ïa kane ka bynta, kum kawei na ki prokram ki jong ka, ban kyntu kynrong ïa ka Sap ka Phong la ha kano kano ka laiñ ruh.
Laïoh ki kyntien na ka Ridamaya, kaba la ïathuh ba ka jingpynkhreh ka jong ka sha kiwei pat ki jingïakop ka dangïaid mynta. Ka pan ka jingkyrshan ba radbah na ki paidbah la ha kano kano ka rukom ruh, da kaba ai khublei kyrpang ïa ka Synjuk Waheh Chnong Jowai ba ka pynlong ïa kane ka prokram, kum shibynta ban aibor ai mynsiem ïa ka ban ïaid shaphrang.
Laïoh ïa ki kyntien ai khublei na u Charemi Laloo, Assistant General Secretary ka Synjuk.
Hadien ba lakut ka jingïalang pynkup burom, ki nongwan pdiang ki lamih, ka jingïalang pynthymmai nongkitkam ka lasdang, ha kaba lajied thymmai na ka bynta ka snem treikam 2025 -2026 ïa kine harum President ma Jlan Kupar Rymbai, Waheh Chnong Loompariat, Vice President ma Riquoma Rq. Laloo, Waheh Chnong Panaliar, General Secretary ma R.L. Bimee Suwer, Waheh Chnong Loompyrdi Ïongpiah, Assistant General Secretary ma Charemi Laloo, Waheh Chnong Dongmihsngi, Treasurer ma Harwis C. Dkhar, Waheh Chnong Mooralong. Baroh ki Waheh Chnong jong ki Durbar Shnong kin long ki Executive Members ka Synjuk kumba ju long mynshwa. Lajied ruh ïa u Anderson Manner, General Secretary Loompariat, u Ram Sumer, Assistant General Secretary Panaliar bad u Elad Suting, General Secretary Khimusniang, kum ki dkhot ka Auditorial Board.
Ha ka jingïalang, ka ïing ka larai ruh ban pynrung dkhot sha ka General Body jong ka Synjuk ïa ki Chairperson bad Secretary jong ki Seng Kynthei kawei pa kawei ka Durbar Shnong bad kan treikam ha kane ka ophis thymmai.
