New Delhi, Iaiong 28 : Ka President jong ka ri India, ka Droupadi Murmu ka la sam 4 tylli ki khusnam Padma Vibhushan, 10 tylli ki khusnam Padma Bhushan bad 57 tylli ki khusnam Padma Shri na ka bynta u snem 2025 ha ka Civil Investiture Ceremony-I kaba la long ha Ganatantra Mandap jong ka Rashtrapati Bhawan mynta ka sngi.
Ka President jong ka ri India ka la pynkup burom Padma Shri ïa u Prof. David R. Syiemlieh na Meghalaya na ka bynta ka kam thoh kam tar bad jingpule ha kane ka jingïalang sam khusnam.
Ha kane ka sngi la don lang u Vice President ka Ri India u Jagdeep Dhankhar, u Myntri Rangbah duh ka ri u Narendra Modi, u Myntri kam pohïing ka sorkar pdeng uba dei ruh u myntri ka tnad treilang u Amit Shah, ki myntri jong ka sorkar pdeng bad ki kynrem ki lyndan.
Ki nongïoh khusnam Padma kin leit ai burom ha ka National War Memorial lashai ka sngi ka 29 tarik Iaiong 2025. Kin leit jngoh ruh ïa ka Rashtrapati Bhawan bad ka Pradhanmantri Sangrahalaya.
Ka jingthoh lyngkot shaphang ka jingim bad ka jingtrei jong u nongïoh khusnam ka long kumne harum:
U Prof. David R. Syiemlieh u dei u riew shemphang ha ka histori bad ka deiriti jong ka thaiñ shatei lammihngi bad u Chairman barim jong ka UPSC La kha ïa u ha ka 22 tarik Kyllalyngkot 1953 ha Mutrapore, Sibsagar, Assam, u Prof. Syiemlieh u la pyndep ïa ka graduate bad Honours ha ka History ha u snem 1974 na St. Edmund’s
College, Shillong. Hadien kane u la pyndep ïa ka M. Phil ha u snem 1980 bad Ph.D ha u snem 1985 na North-Eastern Hill University. U la hikai ha St. Edmund’s College (1977- 1979) bad NEHU (1979-2012) ha kaba u la bat ki kam bapher bapher kynthup ïa ka Dean Students’ Welfare; u heh duh jong ka Tnad History; u Nongpynïaid ïa ki eksamin; la bat ïa ka kam kum u Registrar bad u la bat ïa ka kyrdan kum Pro- Vice-Chancellor. U la shah thung kum u Vice-Chancellor jong ka Rajiv Gandhi University, Arunachal Pradesh ha u Risaw 2011. U la ïasoh kum u dkhot jong ka Union Public Service Commission ha u snem 2012 bad ha u snem 2017 u la shah thung kam u Chairman ka UPSC.
Ka kot ba nyngkong eh jong u Prof. Syiemlieh, British Administration in Meghalaya: Policy and Pattern, Heritage Publishers, New Delhi, 1989 ka la pynskhem ïa u kum u riewstad uba la pynshong nongrim ha ka histori bad ka kolshor jong ka jylla Meghalaya bad ka thaiñ shatei lammihngi. Hadien kane la bud sa ka Survey of Research in History on North East India 1970-1990 bad ka kot ba la pynbeit ryntih bad u J. B. Bhattacharjee, Early States in North East India. Ki kot kiba u la pynmih dang shen ki long On the Edge of Empire: Four British Plans for North East India bad Layers of History: Essays shaphang ki Khasi-Jaintia, ka jinglum lang ïa ki 17 tylli ki jingthoh shaphang ka histori bad ka kolshor jong ki Khasi-Jaintia jong ka Meghalaya. U la pynïaid ïa ka jingwad bniah, jingpynbeit bad jingpynmih ïa ka Meghalaya at Fifty 1972-2022, kaba la pyllait paidbah ha ka 21 tarik u Kyllalyngkot 2022 ha ka jingdap sanphew snem jong ka jingseng ïa ka Jylla Meghalaya. U la wad bniah bad lap ïa ka tarik jong ka jingiap bad kiwei kiwei ki jingtip ba bniah shaphang ki sngi ba khatduh jong U Tirot Sing, u Syiem jong ka Hima Nongkhlaw ha ki lum Khasi, Meghalaya, uba la shim ïa ka bynta ba hakhmat eh ha kaba pyrshah ïa ka jingrung jong ki phareng sha ki lum Khasi bad u la iap katba u dang don hapoh ka jingshah set phatok ha ka 17 tarik u Naitung 1835 ha Dhaka. La rakhe ïa kane ka sngi man la u snem ha Meghalaya kum ka sngi shuti jong ka Jylla ban kynmaw burom ïa ka jingim, ka jingaiti bad ka jingieit ri jong une u nongïaleh laitluid uba bun kim da tip bha.
U Prof. Syiemlieh u la ïoh shibun ki scholarship/fellowship kiba kynthup ïa ka scholarship post graduate jong ka Sorkar India; Senior Fulbright Fellowship na ka bynta ka jingwadbniah ha USA; Charles Wallace Grant na ka bynta ka jingwad bniah ha UK bad Indo-France Cultural Exchange Grant na ka bynta ka jingwad bniah ha Paris. U la shah jied kum u President, NEIHA ha u snem 2010-2011. U la long u dkhot ar samoi jong Indian Council of Historical Research, New Delhi. U la long u dkhot Council jong ka Indian Council of Social Science Research, New Delhi shi samoi. U la shah jied kum u President jong ka Modern India Section, Indian History Congress ha ka dorbar kaba 73 jong ka, Bombay University ha u bnai Kyllalyngkot 2013. U don ha ka academic council bad ka board of management jong ki katto katne ki skulbah. Ha ka jingkyrshan ba bteng jong u ïa ka pule puthi bad ka thoh ka tar u long u Adviser, Meghalaya State Education Commission, ka Sorkar Meghalaya.
