Shillong, Jylliew, 24: U samla rangbah Damutlang Marboh na Nongrah, uba la hap ban duh noh ïa ka kjat kadiang na ka daw ka jingshah tynrah kali, ha ka nohphai sngi 24 tarik u Jylliew, 2022 la ïoh pdiang da ka dukan die mar khutia mutia khnang ban im kamai ja kpoh ban bsa ïa ka ïing ka sem.
Ïa kane ka dukan la noh synñiang da u Dr Jemino Mawthoh, MLA barim ka Nongthymmai Constituency uba dei ruh u General Secretary ka United Democratic Party (UDP).
La ïa donlang ban sakhi ïa kane ka sngi da ki kmie ki kpa u Damutlang, ka kurim, ki hynmen ki para, ki bahaïing lem ki paralok parajor nalor ki kynhun longkmie bad ki rangbah.
Kum ban shu kdew ba u Damutlang u la shah tynrah ha kawei ka trok katba u dang don ha lynti na jingbylla ha Lad Smit myn ha ka 7 tarik u bnai Lber, 2022.
