Nongpoh, Nohprah 09: U Bah Monlang Thangkhiew u ba dei uwei naki nongrep bad nongri jingri naka shnong Nonglakhiat ka jylla Meghalaya u la ioh pdiang ïaka Farmers Award of the Year 2025 kum uwei naki nongrep u ba trei shitom bad trei minot ban ïeid ïala ka jong ka kam.
U tei u rangbah u la leit ban shim ïa katei ka khusnam na IARI Mela Ground Pusa New Delhi na kti jong u Ricky Thaper, Jt Secretary, Poultry Federation of India, ha ka jingdon ryngkat ka Dilyana Blagova kaba dei ka Global Expert on Floriculture na ka Ri Bulgaria.
Naka liang u Bah Monlang Thangkhiew haba kren ha kane ka sngi u la pynpaw ka jingsngewkmen kaba khraw ban iohpdiang ïa katei ka khusnam kaba um shym poi pyrkhat kum u nongrep ban poi shaduh nongbah Delhi ban pdiang ïa katei ka khusnam kaba khraw, bad ainguh ïa u Blei nongbuh nongthaw u ba la btin lynti bad ka iing ka sem kiba ju kyrshan ïa u naka por shaka por.
U la ong ruh ba kum u nongrep u poi shaduh kane ka thong dei namar ka jingtrei shitom, ka jinglen lade jong u ban ïeid ïaka kam kaba u trei, laka long haka kam rep ne ka kam ri jingri namar dei kane kaba kyrshan ïa u bad ka iing ka sem.
U la kyntu ruh ïaki para nongrep haka jylla ban minot bad trei shitom ban ïeid ïaka kam, namar ka jingtrei shitom hi la ka long ha kano kano ka kam kan ïalam ïaki sha ka thong haka jingim jong ki.
