Nongpoh, Jylliew 19: Ka long ka jingsarong bad ka burom ym tang ïa ka Shnong Mawkyrdem kaba la ioh pdiang ha ka kyrdan balai ïa kata ka ‘4th National Water Award’ ha Nongbah Delhi, hynrei kane ka jingioh pidang katei ka shnong ïa katei ka khusnam ha ka kyrdan ka balai napdeng ki shnong nongkyndong hapoh ka ri India ka long ruh ka burom ïa ka District Ri Bhoi bad ïa ka jylla hi baroh kawei ba na kane ka shnong Nongkyndong ka sorkar India lyngba ka Ministry Jal Shakti ka la jied ban ai ïa kane ka khusnam kyrpang.
Ïa kane ka khusnam ba la tip kum ka ‘4th National Water Award’ sa sam da u Vice President ka Ri India, u Jagdeep Dhankhar ha ka jingïalang kaba la long ha ka 17 tarik u Jylliew 2023 ha Vigyan Bhavan, New Delhi.
Kumba la pynpaw, ka Shnong Mawkyrdem ba hap ha ka Bhoirymbong C&RD Block ka la shah jied ban ioh pdiang ïa kane ka khusnam ba la tip kum ka 4th National Water Award’ ka dei halor ka jinglah jong ka shnong ban pynneh pynsah ïa ki tyllong um (Natural Resource Management) ba la kyrshan da ka World Bank bad la ba la pyntreikam ïa ka projek da ka Meghalaya Basin Management Agency bad ryngkat ka jingkitkhlieh lang da ka bor shnong ka shnong Mawkyrdep.
Haba leit shim ïa katei ka khusnam ba la sam da u Vice president ka ri India ha Nongbah Delhi la ïalam da u Rangbah Shnong, u Bah Jibansius Ramshon bad u Secretary Shnong, u Bah Michael Lyngdoh bad la synran lang ruh da ka jingdon lang u Gunanka D.B, IFS, APD-CLLMP, bad ki nongmihkhmat na ka MBDA-MBMA.
Haba ioh ban ïa kren bad u Rangbah Shnong ka Shnong Mawkyrdep halor kane ka jingioh pdiang ïa kane ka khusnam na ka sorkar India, u Bah Jibansius Ramshon, u la ong ba ka Shnong baroh kawei hi ka sngewkmen bad ka ai ka jingkhublei kaba kyrpang sha ka sorkar jylla lyngba ka MBDA-MBMA ha kaba da ka jingïatrei lang ka shnong ka la ioh ïa kane ka burom ban ioh pdiang ïa katei ka khusnam halor ka jinglah ban pynneh pynsah ïa ki jingdon jingem ka mei mariang kaba long ka jingmyntoi na ka bynta ki paidbah nongshong shnong.
U la ong ruh ka daw kaba la pynlong ïa kane ka shnong ba kan ioh pdaing ïa kane ka khusnam na ka sorkar India napdeng ki shnong nongkyndong hapoh ka ri India, ka dei hi ka jingpyndonkam hok ïa ka skhim ba la mang da ka sorkar khlem da pyndonkam bakala bad ruh kaba dei hi ka jingïatrei lang naduh ki bor sorkar ba peit ïa kane ka kam bad ryngkat ki paidbah nongshong shnong ka Shnong Mawkyrdep.
Ka khubor kaba une u rangbah shnong u angnud ban ai sha kiwei pat ki shnong hadien ba la ioh pdiang ïa kane ka khusnam, u la ong ba lada ngi kheiñ kor hi ïa ki jingdon jingem ha pneh ka mei mariang, ka mariang ka la ai lypa ka jingkyrkhu ïa ngi bad namar kata kum ki paidbah nongshong shnong ngi dei ban don kata ka jingsngewthuh halor ka jingkordor ban pynneh pynsah ïa baroh ki jingdon jingem hapoh ka mei mariang khamtam ha kine ki sngi lada ngim lah ïada kyrpang ïa ka mei mariang ka jingeh kaba khraw bha ka dei ka jingkyrduh ïa ka umbam ka umdih, u la bynrap.
