Ïoh pdiang ka Kong Reliance Pyrngap ïa ka National Florence Nightingale Award

Shillong, Jylliew, 22: Ka President jong ka ri, ka Droupadi Murmu ha ka sngi Palei ka la sam ïa ka khusnam National Florence Nightingale Award na ka bynta u snem 2022 bad 2023 sha ki Nurse kiba shakri ha kylleng ki bynta jong ka ri ha ka jingïalang kaba la long ha Rashtrapati Bhavan, New Delhi.
Ka Kong Reliance Pyrngap na jylla Meghalaya ka la ïohpdiang ïa ka khusnam National Florence Nightingale Award na ka bynta u snem 2022 halor ka jingtrei shitom kaba la palat 35 snem kum ka Auxiliary Nurse Mid-wifery (ANM) bad kum ka Lady Health Visitor (LHV).
Ka Kong Pyrngap ka la ai jingshakri ïa ki paidbah ha Saipung Primary Health Centre bad mynta ka la trei ha Sutnga Community Health Centre, East Jaiñtia Hills.
Ka long kaba tbit ha ka kam bad kaba kloi ban ïarap haba don kano kano ka jingeh ha ka imlang sahlang.
Dei ban ai jingïaroh ïa ka jinglong nongïalam, ka jingtrei shitom bad ka jingsngewlem jong ka. Ka Kong Pyrngap ka la pyllait im ïa shibun ki mynsiem briew ha ka por ba ki longkmie ba armet ki leit ban kha khunlung. Ka la pyntbit ïalade da kaba ïashim bynta ha ki prokram CNE bapher bapher ba la pynlong ha ka ri, ha jylla bad ki distrik. Ki paidbah bad ki bor pynïaid distrik ki la ai jingïaroh ïa ka jingai jingshakri jong ka Kong Reliance Pyrngap sha ka imlang sahlang.
Ha ka jingïakren bad ka PIB Shillong, ka Kong Pyrngap ka la pynpaw ka jingkmen da kaba ong, “nga sngewkmen bad sngewhun ban ïoh ïa kane ka jingithuh na ka bynta ka jingtrei shitom jong nga bad nga la pyrshang ban ai shispah na ka shispah naduh ba sdang haduh ba kut u snem. Ka long kaba eh ban ai shispah na ka shispah hynrei kane kam shym la pynsangeh ïa nga na ka jingtrei shitom kaba la pynpoi ïa nga sha une u pud ban ïoh ïa kane ka khusnam.”
“Nga kwah ban kyrpad ïa ki paralok jong nga kiba dang trei ba kin trei minot ban kynjoh sha kane ka thong jong ka jingjop na ka bynta kane ka kam kaba kongsan kaba ngi ai jingshakri sha ka imlang sahlang,” ka la bynrap.
Haba pynpaw ka jingsngewnguh ïa ka Sorkar India bad ka Sorkar Meghalaya kiba la jied ïa ka na ka bynta kane ka khusnam, ka Kong Pyrngap ka la ong, “kane ka ka jingithuh jong ka Sorkar ïa ka jingtrei shitom jong nga.”
Ka tnat ka Koit ka Khiah jong ka Sorkar India ka la sdang ïa ka khusnam National Florence Nightingale Award ha u snem 1973 kum ka dak ka jingithuh ïa ki jingai jingshakri jong ki Nurse sha ka imlang sahlang.
Ka Myntri ka tnat ka Koit ka Khiah ka sorkar Meghalaya, ka Dr. AmpareenLyngdoh ka la ai khublei ïa ka Kong Pyrngap da kaba ong, “nga kitbok kitrwiang bad nga ai khublei ïa i Kong Reliance Pyrngap, Lady Health Visitor na Sutnga CHC, East Jaiñtia Hills iba la ïoh ïa ka khusnam National Florence Nightingale Award. Kane ka jingai jingithuh ka pyni ïa ka bynta kaba khraw ba i la don kum i nurse badka dei ka dak jong ka jingshim khia bad ka jingtrei shitom jong i ha ka jingai jingsumar ïa kibriew.”
“Ngi ai jingburom ïa i kong Reliance Pyrngap bad baroh ki nongaijingsumar kiba ai jingshakri ïa ka imlang sahlang, kiba kyntiew ïa ka jingim jong ki briewbad kiba wanrah ïa ka jingbha kaba neh,” ka la bynrap.’
“Ka jingbahkhlieh bad ka jingsngewlem jong i ka aimynsiem ïa ngi baroh bad ka Sorkar ka pynpaw ïa ka jingsngewnguh ïa ki kam kiba i la lehha ka jingai jingsumar,” ong shuh shuh ka Dr. Lyngdoh.
Ka tnat ka koit ka khiah jong ka Sorkar Pdeng ka la sdang ïa ka khusnamNational Florence Nightingale Award ha u snem 1973 kum ka dak ka jingithuh ïa ki jingaijingshakri jong ki nurse sha ka imlang sahlang. Ha kajuh ka por, ka Khasi Students Union (KSU) East Jaiñtia Hills District Unin ka la pynpaw ïa ka jingsngewkmen bad ai ka jingïaroh ïa ki kam babha jong ka Kong Reliance Pyrngap kaba la shah pynkup burom da ka National Florence Nightingale Award.
Lyngba u kyrwoh ba la phahd da u Publicity Secretary ka seng u samla Hamewanpynhun Ryngkhlem ka seng ka la ong, “kane ka jingïoh pdiang ka Kong Reliance Pyrngap ïa ka khusnam kan dei ka nuksa kaba bha ïa ki Nurse bad kumjuh ruh ïa ki samla bad ïa baroh ki paidbah jong ka jaitbynriew ban sngewthuh kumno ba kin shakri kham bha ïa ka ri bad ka jaitbynriew la ha kano kano ka bynta ba ki trei, watla ka dei ka kam kaba rit ne ki kam kiba sawa jam. Khublei shibun Kong Reliance Phyrngap ïa ka nuksa ba phi la ai kan long ruh ka nuksa ïa ki pateng ki ban wan.”