Ïoh pdiang ka Babadam PHC ïa ka khusnam NQAS namar ka jingshakri ba paka

Shillong, Naitung, 27: Ka Babadam Primary Health Centre (PHC) ha West Garo Hills ka la ïoh ïa ka jingithuh ne ka nam National Quality Assurance Standards (NQAS) na ka Ministry of Health and Family Welfare jong ka Sorkar Pdeng, kaba long kum u mawjam ka jingithuh ïa ka jingïaid lynti jong ka Jylla Meghalaya sha ka jingshakri ba paka ha ka jingai jingsumar ïa ki paidbah ka jylla.
Kumba la pruid dak da ka National Health Systems Resource Centre (NHSRC) hapoh ka Quality Council of India (QCI), ka rukom treikam jong ka NQAS ka bishar bniah ïa ki jaka sumar paidbah ha kylleng ka ri halor ki kyndon ba kongsan kum ka jingsumar ïa ki nongpang, ka jingïada na ka jingpur ki jingpang, ka jingkhuid jingsuba, bad ka rukom ai jingshakri.
Da kane ka khusnam, ka Babadam PHC mynta ka dei ka Primary Health Centre kaba nyngkong eh ha baroh kawei ka rilum Garo, ban ïoh ïa kane ka jingithuh.
Haba kren halor kane ka burom ba ka PHC ka ïoh, na ka liang ka Sr. Riya kaba dei ka Health Program Manager ha Babadam PHC ka la ong, “Kane ka jingithuh ka dei ka na ka jingkyrkhu U Blei, ka jingtrei shitom, bad ka jingaiti lut jong ka kynhun jong ngi baroh kawei. Ngi la ïatreilang ban pynlong ïa ka jaka sumar kaba khuid, kaba ïadei bad ki nongpang, bad kaba paka. Ka jingpdiang ïa ka jingpynshisha jong ka NQAS ka la pynshlur ïa ngi ban bteng ban kyntiew ïa ka kyrdan jong ka jingsumar na ka bynta ka imlang sahlang jong ngi.”
Ka la bynrap shuh shuh, “Kum ka jaka sumar jong ka IPA, ngi la don ka jinglah ban thmu katkum ki jingdonkam jong ka thaiñ, ban ïatreilang kham jan bad ki paidbah, bad ban pynkhlaiñ ïa ka jingkitkhlieh jong ki nongtrei. Kata ka la wanrah ïa ka jingkylla kaba shisha ha ka rukom ba ngi ai ïa ka jingsumar ïa kiba pang man la ka sngi.”
Ka Babadam PHC ka dei kawei na ki 122 tylli ki jaka ba la jied hapoh ka Internal Performance Agreement (IPA) model, kaba dei ka jingthmu hapoh ka Meghalaya Health Systems Strengthening Project (MHSSP) bad kaba la bei tyngka da ka World Bank. Ka IPA ka dei ka rukom ai pisa kaba pynshong nongrim ha ki jingshakri ban pynkhlaiñ ïa ki jaka sumar da kaba pynïadei ïa ka jingtreikam bad ka jingai pisa.
Ïa ki jaka la bishar bniah katkum ki thong ba la buh lypa, bad kito kiba ïoh ïa ki score kiba kham heh ki lah ban ïoh ïa ki lad jingïarap bad jingkyrshan ba kham bun. Lyngba kane ka rukom, ka jylla ka thmu ban kyrshan ïa kine ki jaka ha kaba ïoh ïa ka jingpynshisha jong ka NQAS, kumta, ban pynkhlaiñ ïa ki rukom treikam, ban pynbha ïa ki jingshakri, bad ban pynshlur ïa ka jingshakri kaba kham paka.
Ka jingjop jong ka Babadam PHC ka pyni ïa ki bnai jong ka jingpynkhreh, ka jingpynkhlaiñ ïa ka jingtreikam bad ka jingpyrshang ban pynbha ïa ka jingshakri ba la shim da ka kynhun jong ka PHC ha ka jingïatreilang bad ka Joint Directorate Quality Committee, ïa kaba la seng lyngba ka jingbei tyngka jong ka IPA hapoh ka MHSSP, ka ophis jong u District Medical and Health Officer (DM&HO), WGH, ka MHSSP bad ka National Health Mission (NHM). Kine ki la trei borbah ha ka jingïaid lynti haduh ban da ïoh ïa katei ka nam.
Kane ka jingjop ka long ka jingpynshisha ïa ka jingaiti lut jong ki nongtrei ka koit ka khiah kiba hakhmat eh ha kaba pynpoi ïa ka jingsumar kaba pynshong nongrim ha ki nongpang, wat ha ki jaka kiba jngai tam bad kiba duna ka jingshakri. Ka long ruh kum ka jingai mynsiem ïa kiwei pat ki PHC bad ki jaka sumar ha kylleng ka Meghalaya ban bud ïa ki jingthew jingkhein kiba don ka thong, kaba noh synniang sha ka rukom sumar paidbah kaba khlaiñ bad kaba lah ban pynmyntoi ïa ki paidbah ka jylla.