Shillong, Jymmang: Ka Youth Hostel Association of India-Meghalaya State branch ha kane ka sngi Saitjaiñ ba la lah ka la ïoh ban jied ïa ki nongkitkam ba thymmai jong ka na bynta ka soi treikam ba lai snem 2022-25 ban pyntyllun ïa ki kam ka synjuk.
Ki nongkitkam bathym mai ka YHAI ki kynthup ïa u State president bah Sephanaiah L Rapthap, State Chairman bah Everard Nongsiang, State Vice President lai ngut bah Mana Andress Shadap, Hiambok S Basaiawmoit, B Kualr Khongjirem, Treasurer bah Fabian R Syeim.
ïa ki nongkitkam bathymmai la pynbna da ka national observer ka Roopa Nair kaba dei ka State president na Goa bad u D chakraborty presiding officer ba long ruh u State secretary Meghalaya.
Ha ka jingshisha katkum ki kyndon jong ka YHAI ban jied ïa ki nongkitkam bathymmai la ju pynlong da ka ilekshon, hynrei namar ba ym don kiwei kiba thep kyrteng ban ïakhun pyrshah ïa kitei ki post kumta kiba la thep kyrteng ki la rah suk ïa ka jingjop khlem nongïakhun pyrshah mynta ka lynti.
Ka Roopa Nair ka pynpaw ïa ka jingkmen ban ïa don bynta ka jingïalang jied nongkitkam thymmai bad kyntu ïa ki nongkitkam ba kin shimkhia ïa ka kam ba la bynshet ha ki, ka la ong ka Meghalaya ka don ka spah mariang kyrhai bad kyntu ïa ki nongïalam ban shimkhia ban pynneh ïa kine ki spah mariang na bynta ka lawei.
Kum ban pynpaw ka YHAI ka don bynta bakhraw ban ïarap ïa ki samla ha ka jylla bad kylleng ka Ri kiba dei ki dkhot jong ka YHAI kiba leit donkam kylleng ka ri India ba ki lah ban ïoh jaka sah ha ka dor ba jem ha centre ha kiwei ki jylla.
Kaba sngewtynnad ka YHAI-Meghalaya state branch ka ju pynlong ïa ki prokram treking nalor kiwei ki prokram ha ka jylla, khnang ba ki paidbah nongshong shnong ka jylla bad khamtam kiba wan na shabar kin tip ïa ka jingitynnad ka mariang ha Khasi-Jaiñtia bad jingdon jingem ha ki sawdong sawkun jong ka bad ka hikai kumno ba ki briew ki dei ban pynneh ïa ka spah mariang ba la ai U Blei nongbuh nongthaw.
