Mawkyrwat, Nohprah 16 : Ka Synjuk Rangbah Shnong Hima Nobosohphoh Syiemship mynta ka sngi ka 16 tarik u Nohprah, 2025 ka la ïoh ban jied thymmai ïa ki nongkitkam jong ka ha kaba u bah Bokstone Thongni kum u Chairman bad u bah Ferdinand Syiemiong kum u Secretary ba thymmai.
Ïa ki nongkitkam ba thymmai jong ka Synjuk Rangbah Shnong Hima Nobosohphoh Syiemship la pynskhem ha ka jingïalang ba la pynlong ha phyllaw jong ka Dorbar Hall Rangblang South West Khasi Hills District da u Pynkhrawborlin Kharjahrin uba dei u MDC jong ka Mawkyrwat Constituency bad kum u EM ka Khasi Hills Autonomous District Council (KHADC).
Kiwei de ki nongkitkam ba shah pynskhem ki kynthup ïa u Frejune Lyngdoh Langrin bad u Herbert Iawphniaw kum ki Vice Chairman, u Riskoman Ramsiej bad u Leningstar Kharjahrin kum ki Assistant Secretary, u Shainingstar Lyngkhoi kum u Treasurer, u F. Nongrum kum u Adviser ha ryngkat kiwei de ki nongkitkam ba hakmat bad ki 11 ngut ki dkhot kynthup ïa ki Sordar Shnong bad ki Secretary Shnong.
Ha kane ka sngi la ïoh ka jingkren kyrkhu kyrdoh na u bah Pynkhrawborlin Kharjahrin uba dei u MDC jong ka Mawkyrwat Constituency kumjuh ruh na u u bah Ferdinand Syiemiong uba dei u Acting Syiem ka Nobosohphoh Syiemship, bad ka jingkren pynshai paidbah ïa ka jingthmu jong ka Synjuk Rangbah Shnong Hima Nobosohphoh Syiemship da u bah Bokstone Thongni uba dei u Chairman ba thymmai ha ryngkat kiwei de ki dkhot jong ka Synjuk.
Kiba la sakhi lang ha kane ka sngi ki long naduh ki Sordar bad ki Secretary Shnong, ki Lyngdoh bad ki riewrangbah jong ka Hima Nobosohphoh Syiemship.
