Nongstoiñ, Naitung, 12: Ka Election ban jied ïa ki nongmihkhmat sha ka Ïingdorbar Thaw Aiñ ka jylla ka sah satang kumba khyndai bnai duna, ha kaba ki seng saiñ pyrthei ki la sdang ban ïa khih khohreh ban leit thung ïa ki tnad treikam ha ki shnong bad ki polling station bapher bapher ha la ki jong ki jong ki Constituency.
Haba phai ha ka Nongstoiñ Constituency na ka liang ki seng saiñ pyrthei kiba la don ïa ki kyrtong kum ka Congress, ka NPP bad ka AITC, ki kyrtong jong kitei ki lai tylli ki party ki la ïa durut hi khait ban leit tur haman la ki shnong, ban thung ïa ki shnat treikam na ka bynta ban pynkhlaiñ ïa ki party jong ki, na ka bynta ban ïoh khring ïa ki paitbah nongthep vote ba kin jop ha ka election ban wan.
Haba phai sha kitei ki party ka All India Trinamool Congress kaba dang shu rung tymmai hapoh ka jylla bad kiba bun ki riew paitbah bad wat ki riew rangbah ki ju kren beiñ ba ka jingtreikam hapoh ka jylla ka dang lung palat. Hynrei hapoh Nongstoiñ Constituency pat kumba ka long mynta, katei ka party kaba la ïalam da u bah Macmilan Kharbani kum u President, ka la nang ïoh mynsiem shuh shuh, namar tang hapoh kane ka bah Kharbani taiew, na ka liang u kum u nongïalam ryngkat ki nongkitkam, ki la ïoh ban pynskhem ïa ki nongkitkam bad ki dkhot ha ki ar tylli ki primary Unit kawei ha Urkali bad kawei ha Mawduh
Ka jingïoh mynsiem jong ka AITC ha Nongstoiñ constituency, ka dei namar ba ki paitbah ha man la ki shnong ki la mih shakhmat ban wan pynïasoh sha ka party, namar ka jingkwah jong ki ka long ban wanrah ïa ka jingkylla ha ka synshar khaddar naduh u snem ban wan.
Haba pyrshang ban twad jingmut na ki nongkitkam jong ka AITC Nongstoiñ Constituency, ki la ong ba ka synshar khaddar ha ka jylla naduh ka por ba ka Congress ka dang don ha ka bor haduh mynta ba la shimti ïa ka synshar khaddar ha ka jylla da ka sorkar MDA, ba la ïalam da ka NPP, ki jingkular baroh kim shym la urlong.
Nalor kata ki la ong ba naduh ba ka NPP ka la ïalam ïa ka sorkar hapoh ka jylla ki don satang ki jingïakhih bad kitei ki jingïakhih ruh ki long kiba kham pher, namar da ki nongtrei sorkar ki ïakhih pyrshah ïa ka sorkar bad kam don jingïapher satia na ka jingïakhih jong ki khun pyrshah ïa ki kmie ki kpa.
Ka dei ruh ka jingshisha ba ka long thik kumba u kpa bad ka kmie kim lah ban pyndap bam ïa ki khun bad haba ki tngan, ki hap ban ïakhih bad lada ka jingïakhih kam myntoi, kim banse ban leit tuh namar ba thngan.
