Nongpoh, Naitung 19: Da ki phew tylli ki kali kiba kit ïaki dohkha im kiba thmu ban shalan sha ka jylla, kila shah bat haki nongïalam ka HNYF, Northern Region hynne ka step hadien ba kitei ki kali ki dei jong ki bar jylla bad kim don satia ïaki kot ki sla ne jingbit ban wan khaii ïaki dohkha im sha ka jylla Meghalaya.
Kane ka jingleit khynra jong ki nongïalam ka seng HNYF haka thaiñ Byrnihat, hapoh ka jingïalam u Bah Conform Star Jamu President Jirang Circle, ka dei hadien ka jingioh jingtip ba da ki phew tylli ki kali kit dohkha im kila rung sha ka jylla khlem kino kino ki kot ki sla ne kano kano ka jingioh jingbit.
Haka jingtohkit ki nongïalam ka seng kila lap ruh ba kitei ki dohkha ym don ba long trai da ki khasi hynrei la shu pyndonkam bakla ban leh benami haka kyrteng jong ki khasi tang ban ioh rung sha ka jylla bad ban ioh shalan suk ïa kitei ki dohkha.
Naka liang ka seng kala maham ruh ba nangne shakhmat baroh kitei ki bar jylla kiba wan ban shalan dohkha ki dei ban pynbiang ïaki kot ki sla ba donkam naduh ka trading license bad kyrpad ruh ïaka KHADC ban shimkhia ïa kane ka kam ba ka dei ban leh eiei ïakito kiba wan khaii bad shalan mar sha ka jylla khlem da pynbiang ïaki kot ki sla, kaba ktah ruh wat ïaka kamai kajih jong ki trai muluk.
