Shillong, Jylliew 16: Ka Martin Luther Christian University (MLCU) ka la ïoh ïa ka kyrdan kaba nyngkong ha Meghalaya, bad ka kyrdan kaba ar ha ka North East bad kaba 62 ha India hapdeng ki skulbah shimmet ha u snem 2025 ha ka India Institutional Ranking Framework (IIRF).
Da kane ka MLCU ka la paw kum ka jaka pule ne ka skulbah kaba la kiew bha ha kane ka thaiñ shatei lammihngi jong ka ri India, kaba la buh ruh ka jaka hapdeng ki 100 tylli ki skulbah kiba la paw bha ha ka ri baroh kawei.
Kane ka jingïoh jingithuh ka pynphalang ïa ka jingkiew jong kane ka skulbah ha kaba ïadei bad ki jingai jingshakri jong ka ha ki kam pule na ka bynta ki samla pule, ki jingpynthymmai ïa ki rukom treikam bad kiwei kiwei.
Ka jingïoh ïa kane ka kyrdan ha ka IIRF 2025 ka la long ruh halor ki jingkhmih bniah ha ki bynta bapher bapher, kiba kynthup ha ki kam pule, ki kam karkhana bad kiwei kiwei.
Palat 2,500 ki jaka pule ba kynthup ruh ïa ki palat 500 tylli ki private university, ki la paw ha kane ka kynti kaba mynta.
Hadien ba la seng ïa ka ha u snem 2005, ka MLCU ka la sdang ban paw ruh ha kiba bun ki liang bad kumjuh ruh ban kyntiew ïa ki samla pule ha ki kyrdan bapher bapher.
Kane ka skulbah ka la ïaibteng ban ai ki jingshakri ba bha tam ban kyntiew ïa ki sap ki phong ki samla pule bad kiwei pat ki jingnoh synniang ha ka imlang sahlang.
