Khliehriat, Nailar 10: U Superintendent of Police ka East Jaiñtia Hills, u pyntip ba ha ka jan miet jong ka sngi ba Ar ba la lah hadien ba ki la ïoh jingtip halor ka jingdon jong kawei ka mini truck ka ba don ïa u Registration No. TR-05-B-1903 ka ba wan na ka liang Umkiang, NH-06 shapoh Khliehriat ïa ka ba la suba kit ïa ki tiar beaiñ, kumta ruh na ka liang ki bor pulit ki la pynlong ka jingpynap shrip hajan Lumshnong PS, ha ka surok NH-06 ban lapdien ïa katei ka trok.
Hadien ba katei ka trok ka la wan tur sha kane ka jaka ba don ki bor pahara, ka la shah pynieng noh ha ki bor pulit.Hynrei, ha ka jaka ban sangeh kane ka trok ka la pynher sted bad phet krad noh na kane ka jaka.
Kumta na ka liang ka tnat ANTF ha ryngkat ki pulit na Lumshnong PS mardor ki la pynlong ka jingbeh thong ia katei ka trok hadien ki la lap ba la shu iehnoh ia kane ka trok ha ka jingjngai kaba tang 2 km na katei ka jaka ap pahara.
Hadien ba ki la poi ha kane ka jaka ki la shem ba u nongniah jong kane ka trok u la jah rngai.La pynlong ka jingkhynra ïa kane ka trok ha ka jingïadon lang ki sakhi na ki riew shimet ha ka ba la lapdien na ka body jong kane ka trok ïa ki 212 tylli ki song ba la song skhem bha napoh ki synduk plastik bad ki ba don ïa ka jingkhia ka ba haduh 1556 kilo.
Hadien ba la leh ïa ka tes, la shem ba kine ki song ki don ïa u kynja (Marijuana).ïa kine ki mar bad ïa kane ka trok la kurup noh da ki bor pulit.Ha ka ba ïadei bad kane ka jingjia la rejistar ruh ïa ka case hapoh Lumshnong PS bad ka jingthwet ka ba jur ban lapdien ïa u nongñiah bad u trai jong ka kali ka dang ïaid shakhmat.
