Shillong, Nailur 13 : Ki bor pahara khappud jongka India ki Border Security Force (BSF) ki la ïoh ban kem ïa uwei u khar Bangladesh uba kyrteng u Md Hason Ali 62 snem ka rta bad na ka met jongu ki la ïoh ban kurup 3 tylli ki biskit ksiar kiba khiah 348 gram bad shongdor kumba 17,57,748 lak tyngka. ïa une la ïoh ban na khappud ka West Jaintia Hills bad ka Bangladesh.
ïa une u briew la ïoh ban kem najan ka ICP Dawki ha ka por ba u rung beaiñ na IB bad thmu ban leit sha ïew Dawki. Ha ka jingtohkit u la phla ba u la wanrah ïa kane ka ksiar na Mahajanpatti kaba hap ha Sylhet District ka Bangladesh bad u thmu ban pynpoi ïa kane ka ksiar sha Guwahati.
U PRO jongki BSF Meghalaya Frontier u Sh Raj Singh Kataria u la ong ba ki BSF ki pyrkhing bha ban pahara ha khappud India bad Bangladesh da kaba khlem sangeh ne shongthait baroh 24×7. ïa kine ki biskit ksiar la aiti noh sha ki Custom ha Dawki bad ïa une u briew pat sha ki pulit ka Dawki Police Station.
