Ïoh kurup drok ki Pulit Ri Bhoi ba shong dor 75 lak, shah kem 2 ngut ki runar ba kynnoh don kti

Nongpoh, Naitung 27: Da ka jingshim khia ki bor pulit ka Ri-Bhoi ban ïa khun pyrshah ïa ka jingshalan tuh ïa u drok ha ki shnong khappud ka Ri Bhoi bad ka Assam, ki Pulit ka Ri Bhoi hynnin ka miet ki la ioh ban kurup kumba 10 song u drok (Heroin) ba shong dor kumba T. 75 lak ryngkat ki la ioh kem ruh ar ngut ki runar ba kynnoh don kti ban shalan beaiñ ïa utei u drok.
Kane ka jingioh kurup ki Pulit ka Ri-Bhoi ïa utei u drok ka dei hadien ba ki la ioh jingtip ba la don ki runar kiba thmu ban shlan tuh ïa u drok bad da ka jingpynap shrip ha Byrnihat Police Outpost ki la ioh bat ïa kawei ka thuk thuk bad ha ka jingtohkit ki la lap haduh 10 song u drok Heroin bad ki la ioh kem ruh ïa u nongñiah katei ka thuk thuk bad kiwei kiwei ki tiar.
Kumba la ïathuh da u Heh Pulit ka Ri-Bhoi, u Giri Prasad, la ong ba hadien ka jingpynap shrip ïa kitei ki runar, ki Pulit ha ka jingtalasi ki la ioh kurup ym tang ïa utei u drok bad ki la ioh ruh ban kurup ïa katei ka Motorbike kaba don ïa u number ML 05 R 4704 bad la kem ruh ïa kitei ki ar ngut ba shong ha ka bike kiba kynthup ïa u nongñiah bad u nongshong nadien ka bike.
Kitei ki 2 ngut kiba la shah kem la tip kyrteng kum Shanborlang Khongwir bad u Bandapkupar Mawlong.
Hadien ba la dep ban tohkit bad tih bniah halor ka jingioh kurup ïa utei u drok bad kiwei ki tiar, na ka liang ki bor pulit ka Ri Bhoi ki la dep ban register case katkum ka NDPS Act bad ka jingtohkit halor kane ka jingioh kem ïa kitei ki ar ngut ka dang ïaid shakhmat ban leh katkum ki kyndon ka aiñ, ong u Giri Prasad, u heh pulit ka Ri Bhoi.