Ïoh kurup bun tylli ki mashin bad trok kit dewïong, da ki drone la peitngor tih dewïong be-aiñ

Shillong Rymphang 16 : U Myntri Rangbah ka Jylla Conrad K Sangma u la pyntip ha Ïing Dorbar Thawain ka Jylla ba ki bor ka ain ki la kdep ban pynpra haduh 6 tylli ki mashin tan dewïong (crane) kiba pyndonkam ha ka jingtih dewïong be-ain bad ki la ïoh ruh ban kurup haduh 6 tylli ki trok kiba kit ïa u dewïong hadien ka jingjia ha ka krem dewïong beain ha Mynsngat – Thangsko kaba la jia ha ka 5tarik mynta u bnai.
Haba wanrah da ka suo moto statement ha Ïing Dorbar hynne ka sngi u Myntri Rangbah u la ong, “Ka jingpynpra ïa ki mashin tan dewïong kumjuh ka jingkurup ïa ki tiar ba pyndonkam ha ka tih dewïong beain ka la sdang da ka jingpynpra ïa ki 6 tylli ki crane bad kurup ïa ki 6 tylli ki kali ba pynkit ïa u dewïong beain haduh ka 13tarik mynta u bnai watla ka jingpynpra mynta ka dang ïaid.”
Ha kajuh ka por u Myntri Rangbah u la ong ba ki bor pulit kin pyndonkam ruh da ki drone ban peitngor ïa ka jingdon ki kam tih dewïong beain.
Shuh shuh u la pyntip ruh ba haduh mynta ki la dep ban pyllait 24 lak ka bai luksan sha ki bahaïing jong ki 8 ngut na kito kiba khlad ha ka jingbthei ha krem dewïong katba ïa kiwei pat ka kam ka dang ïaid.
“Ka kam kaba ïadei bad ka jingai ïa ka bai luksan sha ki bahaïing jong kito kiba khlad ka dang ïaid mynta da ka jingbuddien kaba man ka sngi bad ki bahaïing ban ïoh ïa ki jingtip kiba donkam,” u la bynrap biang.
Nalor kata u ong ba la dep ruh ban register da ka suo-moto FIR bad la thaw ruh da ka Special Investigation Team ban khlieh da u DIG (Eastern Range). Shuh shuh la ong ba la dep ruh ban kem haduh 7 ngut ki briew haduh mynta.
Ha kajuh ka por la ong ba halor ki 62 tylli ki FIR halor katei ka kam beain, 57 tylli hadien ka jingbthei, bad san tylli na bynta ka jingkit beain kynthup ïa ki ar tylli na bynta ki tiar pynbthei kaba la pynlong mynta ban ïoh kem haduh 14 ngut.
Shuh shuh la ong ruh ba ki jingmana hapoh ka BNSS Section 163 ka treikam ha ki jaka tih dewïong da kaba la pynap haduh 5 tylli ki kynhun ban khynra nalor ki 6 ngut ki ophisar, 8 ngut ki sub inspector bad saw pyrton ki pulit ha katei ka thain.