Ïoh kurup biang haduh 1662 tylli ki mobile na ki 5914 tylli kiba jah bad shah tuh

Shillong, K’Lyngkot 06 : Ki la don haduh 5914 tylli ki mobile phones kiba la pyntip ba ki jah lane shah tuh tad haduh ka 06 tarik Kyllalyngkot, 2026 kiba paw ha ka portal jong ka Central Equipment Identity Register (CEIR) ha Meghalaya.
Na kine, la ong ba haduh mynta, la lah ban lap dien bad ïoh biang haduh 1662 tylli ki mobile kaba pyni ïa ka jingkiew ka jingtreikam jong ka system bad ka jingnang pynbha ïa ka jingïatreilang hapdeng ki nongtreilang, katkum ka Department of Telecommunications (DoT)
Lyngba ka CEIR portal ka plie lad ïa ki nongshong shnong ban pyntip ïa ki mobile kiba la jah ne shah tuh, ban ïarap ha kaba buddien bad ban ïoh bïang ïa ki, bad ïarap ban ïada na ka jingpyndonkam bakla ïa kum kine ki tiar, da kaba kyntiew ïa ka jingïada bad jingshngain jong ki paidbah.
Ka CEIR portal ka ailad ïa ki nongshong shnong ban : khang (block) noh ïa ki mobile phone kiba la jah ne shah tuh, ban khanglad ïa ka jingpyndonkam bakla, ban buddien bad ban ïoh biang ïa ki tiar shisien ba ki la treikam biang ha kino kino ki telecom network bad plie ïa ki tiar ba la ïoh biang khlem jingeh lyngba kajuh ka rynsan.
Ka jingjop jong ka CEIR ha Meghalaya ka long kaba ai mynsiem shibun lyngba ka jingïatreilang kaba tyngeh jong ki Telecom Service Provider (TSPs), ki bor pulit ka Jylla, bad ka jingpynsngewthuh paidbah kaba nangroi shaphang ki jingshakri ki kor ki bor stad mynta ba la ai da ka tnad Telecommunications.
Ka rukom treikam jong ka CEIR kam ïada tang ïa ki jingmyntoi jong ki nongpyndonkam hynrei ka don ruh ka bynta kaba kongsan ha kaba tehlakam ïa ki kam runar kiba ïadei bad ki mobile, ban pynduh mynsiem ïa ka jingkhaii beain ïa kine ki tiar bad ban pynbha ïa ka jingpahara ha ka jingtreikam ki kor digital ha ka Ri.
Kumta la kyrpad ïa ki nongshong shnong ba kin pyntip kloi lada jia ba la jah ne shah tuh ïa ka mobile jong ki lyngba ka portal jong ka CEIR ha https://www.ceir.gov.in.
Ka tnad Telecommunication ka la ong ba ka dang ïai bteng ban pynïar ïa ki jingshakri paidbah lyngba ki kor digital bad ban pynthikna ïa ka jingshakri kaba shngain na ka bynta baroh ki nongshong shnong.