Ïoh khusnam u ma O.R Shallam naka VKIC, ha u snem 2006 la pynkhe im biang ïa ka Shad Sukra

Jowai, Rymphang 05: Shi bynta na ka jingrakhe ïa ka 28th Foundation Day ka Vivekananda Kendra Institute of Culture (VKIC) ha kane ka 31 tarik u Kyllalyngkot 2025 kala pynkup burom ïa uwei na ki riew rangbah ka sor Jowai u ma O.R. Shallam uba dei ruh u President ba rim jong ka Seiñraij Jowai uba la synñiang shibun ki kam ba bha hapoh ka imlang ka sahlang bad ban pynneh pynsah ïa ka Riti ka Dustur.
Ïa kane ka khusnam u ma O. R Shallam ula shah pynkup burom haka jingïalang bala pynlong ha Guwahati Medical College kaba la tip kum ka ‘VKIC Sanmaan 2025’ haka jingsakhi lang jong ki spah nguh ki nongshah khot sngewbha.
Ha ka jingkren sha ki lad pathai khubor mynta ka sngi ha ïing sha jong u, u ma O. R Shallam ula pynsngew ïa ki kam ba bha kiba ula dep synñiang kum u nongshong shnong naduh ki kam ba bah hapoh haka Seiñraij bad ha kiwei de ki Committee, lyngba kine ki kam kala poi jingtip shaduh kane ka seng VKIC ban shim syndon ïa kane bynta ban pynkup burom ïa u kum ka dak ban pynneh pynsah ïa ka Riti ka Dustur jong ka Jait bynriew. “Kane ka dei ka sngi ba kyrpang eh ïa nga ban ïoh ïa kane ka khusnam” la pynsngew u ma Shallam.
U ma O. R Shallam ula long ruh u nonghikai College la 33 snem, naduh u snem 2016 ula long u member ka Board of Management ka Dispur University kumba 6 snem, ula long u member ka Minority Commission Education Cell haduh mynta, ula long ruh u Nominee jong u Lat ka jylla bad u Member ka Selection William Carry University nalor kiwei de ki kam.
Kaba sngewkmen shuh shuh ïa u ma O.R. Shallam ula pynpaw haki por ba u long kum u President ka Seiñ Raij Jowai, la lah ban pynkhie im biang ïa ka Shad Sukra ha u snem 2006 nalor ka jingïatreilang jong ki dkhot ka Seiñraij baroh.