Nongstoiñ, Nohprah 04: Ka Seng Hill Farmers (HFU) West Khasi Hills District, ryngkat ka jingïatreilang bad ka ophis u District Horticulture Officer (DHO) ha ka sngi balang, ka la rakhe ïa ka sngi ba kyrpang ki nongrep kaba la tip ruh ïa kane ka sngi kum ka ‘5th Meghalaya Farmers Day’ bad ka phang pdeng “U nongrep u dei u nongbsa bam”.
Ïa kane jingrakhe sngi kyrpang ki nonngrep, la pynlong ha ka Hall jong ka ophis DHO, ha kaba u local MLA bad MDC bah Gabriel Wahlang MLA, u la long u kongsan ha ryngkat ka jingdonlang u bah Garod L.S.N Dykes, Deputy Commissioner ka West Khasi Hills District, u Commander Shangpliang President ka HFU Sengkmie, ki ophisar na ka tnad Horticulture bad Agriculture, ki nongrep bad kiwei kiwei.
Na ka liang jong ka HFU ha kane ka sngi ka la ïoh ban pynkup burom bad ai khusnam kyrpang sha ki san ngut ki nongrep kiba la paw napoh ka District. Kine ki kynthup ïa u bah Spingwell Kharmashra, ka kong Angela Shangoi, ka kong Estina Kharsyiemlieh, u bah Grossful Pariong bad u bah Mahsing Tympuiñ u parad ba la 110 snem ka rta.
Haba ai jingkren ha ka jingïalang, u bah Commander Shangpliang u la ban jur ïa ka bynta ba kongsan jong ki nongrep ha ka imlang sahlang, da kaba ong ba ka bam ka dei ka bynta ba kongsan jong ka jingim. U la kyntu ïa ka sorkar jylla ban buh hakhmat eh ïa ka rep ka riang nalor kiwei ki bynta na ka bynta ka roi ka par bad ka roi ka par jong ka jylla baroh kawei.
U la khot ïa ki ophisar jong ka rep ka riang ban pyndap ïa ka jingkhang hapdeng ki tnad bad ki nongrep. Kumjuh ruh haba pynpaw ïa ka jingsngewkhia halor ka jingduna ki jaka rep ha Shillong bad ha East Khasi Hills, u bah Shangpliang u la kdew ïa ka jingkiew jong ka jingpynkylla ïa ki jaka rep sha ki jaka sor.
Na ka liang u Deputy Commissioner, ha ka jingkren jong u, u la pynpaw ïa ka jingdonkam jong ki jingleit jngoh bad jurip ïa ki jaka rep da ki ophisar. Ha kajuh ka por u la kyntu ruh ba dei ban buh ïa ki jingthoh bad jinglum jingkheiñ kiba biang na ba sdang.
U MLA u bah Gabriel Wahlang haba ai jingkren kum u kongsan u la kular ban ïatreilang bad ki heh ophisar jong ki tnad ba dei peit ban kyntiew ïa ka kam rep ha ka District bad ban ïakren ruh halor ki skhim rep bapher bapher.
U la kyntu ruh ïa ki ophisar ban kimdei ban pynïar than ïa ki nongrep bad u la pynshlur ïa ki nongrep ban ïatreilang bad ki ophisar bad ban kiar na kaba pyndonkam bakla ïa ki skhim sorkar.
