Mawkyrwat, Jylliew, 29: Ka long kaei kaei ka jingsngewsarong ïa ka dong ka thaiñ baroh kawei ha kaba khliehduh ne Principal jong kawei na ki jaka pule, ka Sngap Syiem College, Mawkyrwat kaba don ha South West Khasi Hills District, u la ïoh pdiang ïa ka “National Education Brilliance Award & Summit (NEBA&S) 2022” ha kaba ïa kane la pynbna ha kawei na ki prokram ba la long ha Welcom Hotel by ITC Hotels, New Delhi ha ka 15 tarik u (May) Jymmang, 2022.
Ïa kane ka khusnam NEBA&S 2022 la ai sha u Dr. Kyntiewkupar Nongsiej kum u wei na ki 10 ngut ki Principal ba tbit tam ha India ne kum u wei na ki ‘Top 10 Best Principals of India’ ha kaba ïa dei bad ka jinglah jong u ban treikam bad ka jingnoh synñiang jong u ha ka kam ai jinghikai ha ka liang ka pule dangle ïa samla jong ka dong ka thaiñ ne wat ha kiwei de ki jaka.
Lah ban kdew ba ïa ka kam kum u Principal, u Dr. Kyntiewkupar Nongsiej u la shimti hadien ba u Dr. S.S. Khongkhliam u la shong thait noh. Hadien kata, u Dr. Nongsiej u la shimti shipor kum u In-charge Principal ha u bnai Rymphang haduh u bnai Jymmang, 2022 bad u la shimti pat kum u khliehduh ne Principal ba pura jong ka Sngap Syiem College naduh ka 1 tarik u Naitung, 2022.
U Dr. K.K. Nongsiej, haba kren ha u Mawphor u la ïathuh ba u la ïoh rung ha kane ka jaka pule naduh u snem 2005 kum u Guest Lecturer bad hadien kata haba ka Governing Body (GB) ka la ïohi ïa ka jinglah jong u ban treikam ka la thung nonghikai ba pura noh ha u snem 2006. Nangta, hadien katto katne bnai na ka liang ka GB jong ka Sngap Syiem College ka la thung pat ïa u ban long u Programme Officer (PO) jong ka National Service Scheme (NSS) ha kaba ha kata ka por ka NSS jong ka Sngap Syiem College Unit kaba don ha ka black list namar ka jingbym treikam. Kumta hadien katto katne snem ba u la shimti ïa ka kam kum u PO jong ka NSS, ma u u la pynïoh ïa ka khusnam University Award bad ma u kum u Best Programme Officer bad ka NSS Sngap Syiem College Unit pat ka ïoh ïa nam kum ka Best NSS Unit jong ka kolej hapoh University Level.
Shuh shuh, u la pynpaw ruh ba kum ka kolej ka hap ban rakhe ïa ka silver jubilee bad ha kine ki snem kiba la dep, la thung ïa u kum u Secretary jong ka Silver Jubilee Committee ha kaba bun ki kam kum ka kolej ka ïoh ban pyndep ha kane ka jingrakhe. Hadien kata pat la thung ïa u ban long kum u Secretary jong ka College Campus Development Committee ha kaba la ïoh ban thied jaka kaba don haduh 22 akar ka bynta ban shna ïa ka jaka pule ba thymmai ne new campus jong ka College bad kiwei de ki kam jong ka.
Kum ka kolej ka la thung ruh ïa u kum u IQAC Co-ordinator bad lyngba kane ka kam la ïoh ban pynïoh ïa ka NAAC Agreeditation ha u snem 2016 bad mynta pat kum ka kolej ka dang pynkhreh ïa ka jingwan jurip kaba ar jong ka NAAC Team jong u snem 2022.
La thung ruh ïa u ban long u Nodal Officer jong ka RUSA Scheme kaba dei ka Scheme Central kaba ïa dei bad ki kam pynroi jong ka kolej baroh kawei. Nalor kine ki kam kiba bun ba kum u nongïalam ba hakhmat u la bat, na ka liang ka GB la thung ruh ïa u ban long u Vice Principal naduh u snem 2019.
“Ha ka Administration pat nga la ïashimbynta naduh u snem 2019 bad ki kam kiba nga la leh ki long kiba bun naduh ba pynlong ïa ki seminar, ki activities bapher bapher ba la pyndep hapoh bad shabar jong ka kolej, ka jingïashimbynta jong nga ha ki workshop, ki seminar (National & Inter National), bad lyngba kine baroh ki kam ne activities ki pynlong ïa nga ba na ka liang ka GB kan thung syndon kum khlieh duh jong ka kolej baroh kawei hadien ba la pyndep ïa ka interview”, ong u Dr. K.K. Nongsiej.
U la pynpaw ruh ba ha kaba ïa dei bad ka jingïoh ïa ka khusnam National Education Brilliant Award & Summit 2022 ka dei ka khusnam ba na ka liang ka NEBA ka don ban ai ïa ka jingithuh na ka bynta jong ki mid administrator ka lah ban long ïa ki Vice – Principal, ki In-charge Principal lane ki full fledged Principal ha kaba ka nongrim jong kane ka long halor ki kam ba na ka liang ki middle administrator ki ai ne ki nohsynñiang sha ka higher education hapoh jong ka Ri India. “Na ki jinglah ban treikam bha bad na ki jingnoh synñiang ha kiba bun ki kam ha kaba na ka liang jong nga nga la dep ban ïa shimbynta ka pynlong ïa kane ka NEBA ba kan ithuh bad kan ai ha nga ïa kane ka khusnam kaba ki khot ka “Top 10 Best Principal of India”, ïathuh u Principal bad ïa kane ki pynbna ha ka 15 tarik u Naitung (May), 2022.
Ha kaba ïa dei bad ka jingïoh ïa ka kyrdan kum u Doctorate, u Dr. K.K. Nongsiej u la ïoh ha ka 29 tarik u bnai Lber, 2022 ha ka Degree of Philosophy na ka Department Rural Development & Agriculture Production NEHU, Tura.
Ha une u snem 2022-23 kan sa sdang noh ïa ka BSc kaba long ka jingangnud jong ki paidbah ka dong ka thaiñ la kham slem. Ka thong jong ka kolej ha ki khyndiat snem ba wan ka long ban plie ïa ki Vocational Course, Entrepreneurship Programme bad ka Post Graduate ha ki katto katne ki Department, u la pynkut bad ha kaba ïa dei bad ka result Higher Secondary Section jong ka kolej ha une u snem ka long palat ïa ka 90% ka jingleh bha jong ki samla pule.
