Ïoh khusnam ka Meghalaya na ka MoHFW ba nang duhjait ka jingpang ‘Khieshohrih’

Shillong, Ïaiong 25: Ka Jylla Meghalaya lyngba ka National Vector Borne Disease Programme-Malaria, kala ïoh ïa ka khusnam na ka Ministry of Health & Family Welfare hynne ka sngi nyngkong halor ka jinglah ban nang pynduhjait ka jingpang “Khieshohrih” (Malaria) hapoh ka Jylla.
Ïa kane ka khusnam la leit shimti da ka Dr Biba, State NVBDCP Programme Officer ha ka jingïalang rakhe ïa ka World Malaria Day.
Kane ka jingïoh khusnam ka Jylla ka dei halor ka jingnang jop ha ka jingïakhun pyrshah ïa kane ka jingpang na ka kyrdan Intensified Control Phase (Ka jingïakhun ban tehlakam) sha ka Kyrdan Elimination Phase (Ka jingïakhun ban pynduh jait).
Kat kum ka jingtip bala ai, ka jingïap jong ki nongpang Khieshohrih ha Jylla Meghalaya kala hiar na ka 40 ngut ha u snem 2015 sha ka 3 ngut ha u snem 2021. La pyntip ba tang 27 ngut ki briew ba ïap pang Khieshohrih ha baroh kawei ka Jylla ha kine ki san snem bala leit noh kata naduh u snem 2017.
“Ngi la lah ban kynjoh sha une u mawmer namar ka jinglap kloi ïa ki nongpang ha ki shnong ki thaw bad ka jing kloi ka jingai jingsumar nalor ka jingsam ei ïa ki musari sha ki jaka ba jur ka jinglynshop kane ka jingpang” ong ki Doktor ka National Vector Borne Disease Programme-Malaria ka Jylla.
Kila pyntip ba hangne ha Jylla, la leh ïa ka test khlem ka jingsiew pisa, ai ei ïa ki dawai dashim, ai ei ïa ki musari sha ki nongpang kaba long kat kum ka National Vector Borne Programme jong ka Sorkar India.
Kila pyntip ba ha ka jingbishar ïa kane ka jingpang naduh u snem 1997 haduh 2019, la lap ba ka jingdon bun eh ki briew ba ïap na ka Khieshohrih ka dei kaba jia ha u snem 2007 ha kaba haduh 237 ngut ki briew kila ïap tang ha ka shisnem bad na kine, haduh 117 ngut kiba ïap ki dei tang na West Garo Hills District.