Shillong, Rymphang 02: Kan long ka khubor kaba bha ba ka Meghalaya Co-operative Apex Bank Ltd (MCAB) ka la shah jied kum kawei na ki State Cooperative Bank kaba la tbit treikam tam hapoh ka ri, hapoh jong ka Two-Tier bad ka la wan balai ha ka jingïoh khusnam na ka National Federation of State Cooperative Bank (NAFSCOB) jong ka mang tyngka u snem 2024-25.
La ong ba ka MCAB kan ïoh ïa ka khusnam, da ka tapmoh bad ka jingthoh jong ka jingai jingithuh bad ïa kane yn sa aiti ha ka prokram sam khusnam ka ban sa long ha Gangtok, Sikkim.
Shuh shuh la ïathuh ba ka Bank ka la ïoh nyngkong shwa ïa ka khusnam kaba nyngkong, baar bad balai na ka NAFSCOB na ka bynta u mang tyngka jong u snem 2020-21, 2021-22 bad 2023-24.
Lah ban pynkynmaw ba la seng ïa ka MCAB ha u snem 1971, kane ka Bank ka la don ïa ki shnat treikam ha kylleng ki bynta jong ka jylla bad kala ai ruh ïa ki jingshakri lyngba ki kor Electronic bad Digital kum ki ATM, Mobile Banking bad Unified Payments Interface (UPI). Ka Bank ka la ïai bteng ban ïoh ïa ka jingïohnong bad kadei ka dkhot jong ka Centralised Payment Systems bad kumta ka la ïoh ïa la u jong u IFSC.
Shuh shuh la ïathuh ba ha u snem 2019, ka Bank ka la ïoh ïa ka jingjop kaba khraw da kaba shah kynthup ha ka Second Schedule jong ka Reserve Bank of India Act, 1934.
La ïathuh ruh ba ha ki snem kiba la dep, kane ka Bank ka la ïoh ïa ka khusnam halor ka jingtbit ban treikam ha ka jingpynïadei bad ki SHG Bank da kaba don ïa ka jingpynïasoh bad ka Ministry of Rural Development ka Sorkar India bad kala ïoh ïa ka jingithuh kum kaba tbit tam ha ka ban khate ïa ka khajna na ka tnat Income Tax.
