Shillong, Nailur, 13: Ka long ka burom bad ka jingkmen ïa ka jylla haba ki khun samla jong ka jylla ki paw pyrthei ha ki jylli kiba heh jong ka ri India.
U Babu Franky Kharnaïor u la shah pynkup burom da ka Inspiring Teachers Award ha ka Hyderabad Sahodaya School Complex, Hyderabad, Telangana ha ka 10 tarik mynta u bnai ha Hyderabad.
Ka Hyderabad Sahodaya School Complex ka dei ka seng kaba peit ïa ki jingbha bad ki rukom hikai ha ki 229 tylli ki school CBSE ha ka Hyderabad Cluster. Ka ju ai khusnam manla u snem ïa ki nonghikai jong ki skul kiba hapoh ka jingpeit jong ka, kiba tbit bad kiba wanrah ïa ki rukom hikai kiba ïarap ïa ki khynnah skul.
Mynta u snem ka la jied ïa u Babu Franky Kharnaïor ban ïoh pdiang ïa ka Inspiring Teachers Award 2025.
U Babu Franky Kharnaïor u dei u nonghikai jong ka Sloka International School, Manneguda, Hyderabad, Telangana la kumba saw snem eiei.
U dei na ka shnong Mawlyngbna, Lawbah, East Khasi Hills, u khun ka Kong Rosti Kharnaïor.
U la pyndep ïa ka jingpule B.A (Philosophy), M.A.Eng.Littr, B.Ed. U la long uwei napdeng ki spah ngut ki nonghikai jong ka Sloka International School, ba ka skul ka niew burom namar ka jing treishitom, ka jingtbit bad ka jingkitkhia jong u ïa ka kam.
Kane ka long ka nuksa ïa ki khun samla jong ngi ba ka burom bad ka jingjop ka wan lada ngi long kiba trei shitom bad kitkhia ha kano kano ka kam ba ngi trei.
