Nongpoh, Ïaiong, 16: Ka ophis jong u Block Mission Coordinator (BMC), Umling BRC mynta ka sngi ka la ai khusnam bad syrnod sha ki 15 tylli ki skul jong ka Umling Block halor ka jinglah jong ki ban shim bynta shitrhem ha ka Tobacco-Free Educational Institutions (ToFEI) ha ka jingïalang kaba la long ha ophis jong u BMC, Umling Block ha Nongpoh.
Ha ka jingïalang la shim bynta ruh da u Bah Mayral Born Syiem MLA ka Nongpoh kum u kongsan, ha ka jingdonlang ka Ruby Das Joint Director of District School Education and Literacy, P.P Yadav BMC Umling Block, kong K.B. Jyrwa, District School Education Officer, Bah Rocky Kylla, Chairman of Umsning Town Dorbar, bad kiwei kiwei ki riew rangbah lem bad ki nonghikai ba mihkhmat na ki 15 tylli ki skul.
Kum ban shu kdew hangne ka ToFEI lane ka Tobacco Free Educational Institutions ka dei ka jingthmu jong ka sorkar pdeng ban pynlong ïa ki jaka ai jinghikai ki ba lait na u duma bad ka dei ka jaka ai jinghikai kaba khang ban pyndonkam bad die ïa baroh ki jait duma, kynthup ïa ki biri, sikret, bad kiwei kiwei ki jait duma hajan ki skul pule na ka bynta ban ïada ïa ki samla pule ba kin ngop ha ki jait duma bapher bapher.
Ka long ruh ka khubor ba sngewtynnad hadien ba ka Umling Block ha ka shah jied bad ïoh khur ïa ka Best Performance Award halor ka jinglah ban nohsynñiang bad shim bynta shitrhem ha ka ToFEI program ha ka jylla baroh kawei.
Haba kren ha kane ka sngi u Bah Mayralborn Syiem u la ai ka jingïaroh halor ka jingshim bynta shitrhem jong ki skul bad u la ban jur ïa ka jingdon kam ka koit ka khiah bad ka bha ka miat ha ka imlang sahlang.
U la ai khublei ïa baroh ki skul kiba la ïashim bynta ha ka ban pynlong ïa ki jaka pule kaba lait na ka jingpyndonkam ïa ki jait duma bad u la ong ruh ka long kaba kongsan ba ngin bteng ban pynphriang ïa ka khubor ban ng em ïa u drok, ong em ïa u duma ha ka imlang ka sahlang khnang ba ngin lah ban pyntikna ba ki samla pule kin ïoh ka jingkoit jingkhiah bad ka jingnang jingstad kaba pura.
